Şaxa Egîtîm-Sen a Sêrtê, li dijî tundiya ku li dibistanan li dijî mamosteyan tê kirin, daxuyanî da û got:
“Daxwaza lêpirsîna îdarî ya ku me li dijî şêwaza rêveberî û zexta sîstematîk a Dibistana Serlêdana Perwerdehiya Taybet a Sêrtê li dijî mamosteyan kir, mixabin ji aliyê lijneya Teftişê ve bê encam hat hiştin.”
Şaxa Egîtîm-Sen a Sêrtê, ji bo şermezarkirina kiryar, tundî û gotinên zayendî yên ku midûrê Dibistana Serlêdana Perwerdehiya Taybet a Sêrtê li dijî memosteyên jin û şagirtan kiribû, li pêşiya avahiya Navenda Perwerdehiya Miduriyeta Sêrtê daxuyanî da.
Gelek mamoste û endamên Egîtîm-Senê, Şaxa ÎHD a Sêrtê, rêvereberên DEM Partiyê û gelek kes beşdarî daxuyaniyê bûn.
Sekreterê Giştî yê Egîtîm-Senê Zulkuf Uçar, beriya daxuyaniyê axivî.
Uçar, bang li rayedaran kir û got:
“Berprisyarê van kiryarên ku li dibistanan têne kirin rayedarên dewletê bi xwe ne û divê mudaxeleyê van pirsgirêkan bê kirin.
Divê Wezareta Polîtîkayên Civakî û Malbatî êdî ew jî ji vê rewşa bêdengiyê derxin û li dijî van kiryaran bibin bersiv û careke din neyên jiyîn.
Em careke din li vir bang dikin ku êdî kiryarên wisa li dibistanan neyên jiyîn.”
Metna daxuyaniyê jî ji aliyê rêveberê Şaxa Egîtîm-Sen a Sêrtê Suleyman Aksal ve hate xwendin.
Aksal, diyar kir serlêdana wan a li dijî midûrê dibistanê bêencam maye û wiha got:
“Di dosyaya lêpirsînê de endamên Lijneya Teftişê raporên li gorî midûrê dibistanê amade kirine.
Kesê ku dosyaya wî bi vî rengî hat paqijkirin, hat xelatkirin û wekî midûrê heman dibistanê hat tayînkirin.”
