Li Swîsreyê di çarçoveya 8'ê Adarê Roja Jinên Kedkar ên Cîhanê de çalakî dewam dikin.
Bi pêşengiya Yekîtiya Jinên Kurd a li Swîsreyê (YJK-S) li bajarê Zurichê çalakiyek hate lidarxistin û Endama Fermandariya Giştî ya YPJ'ê Rohilat Efrîn beşdar bû.
Gelek Kurdistanî û Swîsreyî beşdarî çalakiyê bûn.
Piştî deqeyeke rêzgirtinê panelek hate lidarxistin.
Endama Fermandariya Giştî ya YPJ'ê Rohilat Efrîn, endama Partiya Sosyal Demokrat a Swîsreyê (SP) û nûnera Partiya Demokrat a Kurdistanê Îranê (PDK-Î) Midia Piroti beşdarî panelê bûn.
Midia Piorti behsa serhildana "Jin, Jiyan, Azadî" kir û anî ziman ku ev pêvajo ji bo têkoşîna jinê xaleke girîng e.
Midia Piroti anî ziman ku li hemberî êrîşên li ser Rojava Kurdên li diasporayê daketin qadan û piştevaniya xwe nîşan dan.
Rohilat Efrîn jî di destpêkê de, şehîdên komkujiya 12'ê Adarê ya Qamişloyê û Endamê desteya Hevserokatiya PYD`ê Salih Muslim bi bîr anî.
Rohilat Efrîn diyar kir ku jinên Kurd bi têkoşîna xwe li cîhanê bûn mînak û wiha lê zêde kir:
"Hikûmeta nû naxwaze jinan qebûl bike. Li Şêxmeqsûdê bi êrîşa li dijî cenazeyên şervanên jin xwest me bitirsîne. Lê belê em ji vê natirsin. Em ê têkoşînê dewam bikin."
Rohilat Efrîn anî ziman ku êrîşên li ser Rojava ne tenê li dijî herêmê ne, di heman demê de li hemberî Kurdan hemûyan e û got:
"Berxwedana li qadê û piştevaniya çar parçeyên Kurdistanê û dîasporayê encamên van êrîşan bi sînor kir."
Çalakî bi gerandina govendê û dirûşma "Jin, Jiyan, Azadî" bi dawî bû.
