Şaxa Êlihê ya Sendîkaya Karkerên Lastîkên Kîmya û Petrolê ya Tirkiyeyê (Petrol-İş) ji bo balê bikişînin ser krîza aborî û mafên kesane li ber Avahiya Saziya Petrolê ya Tirkiyeyê (TPAO) kom bûn û daxuyaniyek çapemeniyê dan. Karkeran pankarta bi nivîsa "Em nikarin debara xwe bikin" hilgirtin û ji hikûmetê xwestin ku çareseriyek adil bibîne.
Serokê Şaxa Petrol-Îşê ya Êlihê Loqman Akkûş diyar kir ku hikûmetê bi mehan e tu pêşniyarek neaniye ser maseyê û got: "Me got ku şert û mercên jiyanê her roj dijwartir dibin, we ew paşguh kir. Em bi sebir li benda çareseriyekê man . Di dawiyê de, bi zehmetî we pêşniyarek kir wekî ku ew xêrek be. Ev pêşniyara we hewldanên me paşguh dike."
Em şev û roj kar dikin
Loqman Akkûş axaftina xwe wiha domand: “Em hêza hilberînê ya vî welatî ne. Wek bi hezaran karmendên giştî, em bi xwêdana xwe domdariya xizmetên giştî misoger dikin. Yên ku me birêve dibin, divê şertên dewletek civakî bicîh bînin; divê mafên karker û kedkaran bidin.”
Di çalakiyê de dirûşmên wekî "Em ê bi berxwedanê bi ser bikevin", "Em karker in, em rast in, em ê bi ser bikevin", "Bijî têkoşîna me ya bi rûmet", "Destên ku dirêjî kedê dibin bila bişkên" û "Rizgarî bi tenê tune ye, an hemû bi hev re an jî tu kes ji me tune" hatin qîrkirin.
Rodî Bişeng