Dewleta Îranê, binpêkirinên xwe li dijî gelê Îranê bênavber berdewam dike û bi taybet li dijî gelê Kurd û Belûç.
Pisporên Neteweyên Yekbûyî xwestin ku Îran dawî li girtinên keyfî, êşkence û darvekirinên ku gelên Kurd û Belûç hedef digirin bîne.
Pisporên Neteweyên Yekbûyî, îro bang li Îrayedarên Îranê kirin û daxwaz kirin ku:
"Dawî li zêdebûna girtinên keyfî, windakirinên bi darê zorê,
êşkence, muameleya xerab û bidarvekirinên keyfî yên gel û
bi taybetî jî gelê Kurd û Belûç hedef digrin, bîne."
Neteweyên Yekbûyî, der barê binpêkirinên li Îranê raporek belav kir.
Di raporê de wiha hate gotin:
"Em weke pisporên NY bang li rayedarên Îranê dikin ku dawî li girtinên keyfî, windakirinên bi darê zorê, êşkence û bidarvekirinên ku civakên Kurd û Belûç pê re rûbirû dimînin, bînin."
Pisporan destnîşan kir ku piştî xwepêşandanên ku di Kanûna 2025’an de li Îranê dest pê kirin, bi hezaran kes hatine girtin û bûyerên êşkencê, mikurhatinên bi darê zorê û windakirinên bi darê zorê, zêde bûn.
Her wiha pisporan, eşkere kir ku di şeş mehên ewil ên 2026’an de herî kêm 24 Belûç û 22 welatiyên Kurd hatine darvekirin û gelek kesên din bi xetereya darvekirinê re rûbirû ne.
Di raporê de hat destnîşankirin ku,
"Sûcên wekî sîxurtî, şer, berhevdaniya li ser rûyê erdê û serhildan
bi taybetî li dijî hemwelatiyên Kurd wekî amûrên çewisandinê tên bikaranîn."
Di raporê de hat diyarkirin ku zextên li ser çalakvanên Kurd ên li derveyî Îranê jî zêde bûne û wiha lê zêde kir:
"Milkên bi sedan Îraniyên ku li derveyî welat dijîn tên desteserkirin
û der barê 37 çalakvanên Kurd û rêveberan de biryara girtin û daxwazên radestkirinê hatiye derxistin."
Di dawiyê de, pisporên NY, erkên Îranê yên di çarçoveya qanûna navneteweyî de bi bîr xist û tekez kir ku,
"Êşkence, windakirinên bi darê zorê û binpêkirinên keyfî yên mafê jiyanê qedexe ne.
Divê prensîbên darizandina adilane, azadî, ewlehiya kesane, wekhevî û ne-cudakariyê werin parastin."
Di dawiyê de, pisporan ragihand ku ew ê van mijaran bi rêya diyalogê bi rayedarên Îranê re bidomînin.
