Konseya Ewlehiyê ya NY ji bo xwepêşandanên li Îranê duh pêncşemê civîneke awarte li dar xist.
Di civînê de, li 15 endamên NY û cîgirê nûnerê Îranê hat guhdarîkirin.
Nûnerê Amerîka: Gelê Îranê azadiya xwe dixwaze
Nûnerê Amerîkayê li NY Mike Waltz di civînê de rexne li berteka hikûmeta Îranê ya li hember xwepêşandanan kir.
Waltz tekez kir ku hikûmeta Îranê "ji gelê xwe ditirse".
"Trump mirovekî xwedî çalakîyê ye, ne yê axaftinan e weke yên ku em li vir dibihîzin.
hemî vebijark li ser maseyê ne da ku kuştinan rawestînin.
Asta tundûtûjî û tepeserkirina ku rejîma Îranê li dijî welatiyan û gelê xwe pêk aniye, bandorên wê li ser aştî û ewlehiya navneteweyî hene.
Îro hûn ê ji Îranê bibihîzin ku ev mijareke navxweyî ye. Bi tevahî şaş û nerast e. Ev mijar hewceyê baldariya vê Konseyê ye."
Konseya Ewlehiyê her wiha ji du nûnerên civaka sivîl a Îranî, di nav wan de rojnamevan û rexnegira hikûmetê ya Îranî-Amerîkî Masih Alinejad jî, guhdarî kir.
Nûnerê Îranê: Her kiryarek êrîşkar wê werê bersivdayîn
Cîgirê nûnerê Îranê yê li NY Xulamhuseyîn Darzî tevlîbûna endamên civaka sivîl rexne kir.
Di heman demê de got: "Welatê min ne li dû zêdekirina girjîyê ye, ne jî li dû rûbirûbûnê ye.
Her kiryareke êrîşkariyê, rasterast an nerasterast, dê li gorî madeya 51'ê ya Peymana NY bi bersiveke biryardar û yasayî were bersivandin."
Cîgira Sekreterê NY: Em bang li Îranê dikin ku darvekirinan bisekinîne
Cîgira Sekreterê Giştî yê NY Martha Pobee destnîşan kir ku xwepêşandanên gel ên li Îranê bi lez veguheriye aloziyeke giştî, ku bûye sedema windahiyên mezin ên jiyanê.
"Bi texmînan ji nîvê Çileya 2026'an û vir ve zêdetirî 18 hezar girtî hene, lê NY nikare van hejmaran piştrast bike.
Em bang li Îranê dikin ku bi awayekî mirovî bi girtiyan re reftarê xwe baş bike û "her darvekirinek têkildarî dozên xwepêşandanan rawestîne."
