Nûçegihanê Ajansa Welat Nedîm Oruç 14`ê Çileyê li taxa Nûr a Cizîra Bakurê Kurdistanê dema ku nûçe dişopand bi lêdanê hate binçavkirin û piştre hate girtin.
Wê demê bi Nedîm Oruç re, 8 jê zarok bi giştî 20 welatî bi îdiaya “Tev li çalakiyên li dijî êrişên Rojavayê Kurdistanê bûne” hatibûn girtin.
Danişîna yekem a Nedîm Oruç û 19 kesên din li 1’emîn Dadgeha Cezayê Giran a bajarê Şirnexê hat lidarxistin.
Oruç û 19 welatiyên din bi parêzerên xwe re di danişînê de amade bûn.
Nedîm Oruç li wir îdiayên derbarê xwe de red kir û destnîşan kir ku ew di çarçoveya xebata xwe ya rojnamegeriyê de li wir amade bûye û nûçe şopandiye.
Her wiha hemû kesên pê re girtî parastina xwe kirin û îdiayên li ser xwe red kirin.
Piştre Dadgehê biryara berdana rojnamevan Nedîm Oruç û 19 welatiyên pê re da.
Nedîm Oruç ji aliyê malbat û hevalên wî yên rojnameger, hevserok û rêveberên partiyên siyasî û nûnerên saziyên sivîl li pêşiya girtîgehê hat pêşwazî kirin.
Li rojnamevan Mehmet Uçar salek û 6 meh ceza hat birîn
Di çarçoveya zextên li ser rojnamevanan de, rojnamevan Mehmet Uçar ji ber nivîsên xwe bi îdîaya "Endametiya rêxistinê" hate darizandin.
Rûniştina 5'emîn a dozê li Dadgeha Cezayên Giran a 2'yemîn a Êlihê pêk hat.
Bi îdîaya "Propagandaya rêxistinê" salek, 6 meh û 11 roj cezayê girtîgehê li Mehmet Uçar hate birîn.
Berzan Şêrwanî: Greva rojnamevan Şêrwan Şêrwanî didome
Zextên li dijî rojnamevanan ne tenê li Bakurê Kurdistanê, lê li Başûrê Kurdistanê jî hene.
Rojnamevan Şêrwan Şêrwanî ku bêhtirî 5 salan li Başûrê Kurdistanê girtiye, ev 3 roj in li Girtîgeha Mezinan a Hewlêrê di greva birçîbûnê de ye.
Birayê Şêrwan Şêrwanî, Berzan Şêrwanî bi rêka deng ji ROJ NEWS`ê re axivî û têkildarî rewşa wî ev agahî da.
Berzan Şêrwanî diyar kir ku birayê wî daxwaza berdana bi merc dike, lê bersiva daxwazê red bûye.
