Li Sûriyê, ji ber nebaşbûna rewşa debarê û ya aborî, bang tê kirin ku roja 17`ê Nîsanê xwepêşandan werin lidarxistin.
Hin penaberên Sûrî yên ji derve hatibûn serdana Sûriyê û her wiha pisporên aborî anîn ziman ku xebatên xizmetguzariyê lawaz bûne û bihabûn zêde bûye.
Her wiha metirsî hene ku pirsgirêkên aborî û civakî hîn zêdetir bibin.
Çalakvanên sûrî li ser medya dijîtal bang kir ku roja 17'ê Nîsanê (ku Salvegera Serxwebûna Sûriyê ji Fransayê ye) berê xwe bidin qada parêzgariya Şamê û xwepêşandanê li dar bixin.
Pisporên aborî li ser pirsgirêkên aborî li Sûriyê dibêjin, ji derve destek nayê dayîn û polîtîkaya aboriyê hatiye guhertin.
Pisporan destnîşan kirin ku sektora taybet a xizmetguzariyê berfireh bûye û dema mijarên xizmetguzariyê têkevin destê şîrketên taybet, bihayên elektrîk, av û madeyên sereke jî bilind dibin.
9`ê Nîsanê serokê Hikûmeta Vegûhêz a Sûriyê Ehmed Şera biryarnameyek derxistibû.
Li gorî biryarnameyê, saziyên giştî yên ava vexwarinê, kanalîzasyon, şirketên sektora elektirîk û madenê, dê ji nû ve werin sazkirin.
Hikûmet, vê biryarnamê erênî dinirxîne û navê "Ji nû ve xwe birêxistinkirin" lê dike.
Lê belê Sûrî û pispor vê yekê neyînî dinirxînin û dibêjin, sektora elektirîkê, ava vexwarinê, kanalîsazyon û hwd, dê têkevin destê şirketên taybet.
Pispor û penaberên Sûrî yên serdana welêt kirine, diyar dikin ku bihabûna nan, gaz, elektirîk, kiriya erebe û malan gelekî zêde bûye.
Penaberkî Sûrî ku serdana Şamê kiriye dibêje, rewşa Sûriyê li ser ragihandinê û li ser erdê ji hev cuda ye, xizmetguzarî lawaz e, kar nîne û bandora şer li ser gelek sektoran heye.
