Li Kobanê 6’emîn Festîvala Çand, Huner û Werzîşê ya Şehîd Bawer Agir ji aliyê Tevgera Ciwanên Şoreşger ê Sûriyeyê ve tê lidarxistin, dest pê kir.
Festîval bi dirûşmeya “Bi hêvî û baweriya şehîdan, aştî û civaka demokratîk, azadiya fîzîkî ya Rêber Apo mîsoger bike” li Stadyuma Şehîd Bawer Agir tê lidarxistin.
Bi sedan şêniyên kantona Firatê, nûnerên saziyên Rêveberiya Xwerser a herêma Bakur û Rojhilatê Sûriyeyê, partiyên siyasî, rêxistinên jinan, saziyên sivîl û gelek mêvan ji kantonên Reqa, Tebqa û Cizîrê beşdar bûn.
Festîval ji aliyê dayika şehîdan ve hate vekirin
Festîval ji aliyê dayika şehîdan ve hate vekirin. Piştre hevseroka Desteya Ciwan û Werzîşê ya kantona Firatê Avaşîn Misto axivî.
Avaşîn Misto diyar kir ku ew festîvalê diyarî hemû cangoriyên azadiyê, gelên azadîxwaz û Rêber Apo dikin.
Li ser navê Tevgera Ciwanen Şoreşger a Sûriyeyê Harûn Apoyî axivî û destnîşan kir ku ew ê bi rihê ciwanan dagirkeriyê têk bibin û azadiyê bi ser bixin.
Dayika Şehîd Bawer Îslim Derwîş bixêrhatina hemû kesên amede kir û wiha got: "Hêvî dikim ku ji bo em karibin dijmin têk bibin, xwedî li keda Şehîd Bawer derkevin. "
‘Ev stadyum ji bo ciwanan semboleke bi nirx e’
Endezyarê Stadyuma Şehîd Bawer Agir Xelîl Ebdî jî destnîşan kir ku ew bi vê roja pîroz kêfxweş in û wiha got: "Em vê stadyumê diyarî hemû şehîdên azadiyê dikin û ev stadyum ji bo ciwanan û werzîşê semboleke bi nirx e."
Ji fermandarên Yekîneyên Parastina Jin (YPJ) Sarya Efrîn hemû şehîdên azadiyê bi bîr anî û wiha got: “Di salvegera Şehîd Bewer de, di vekirina vê stadyumê de, em careke din sozên xwe nû dikin, em ê gelê xwe biparêzin û li hemberî dijmin têbikoşin.”
Piştî axaftinan komên hunerî yên pêkhateyên Kurd, Ereb, Ermen û Suryan govendên gelêrî pêşkêş kirin.
