Şerê di navbera Îsraîl-Amerîka û Îranê her ku diçe gûrtir dibe.
Ev şer bandoreke mezin li Başûrê Kurdistan û Îraqê jî dike.
Li gorî agahiyan duh bi şev 3 dronan êrîşî Qada Petrolê ya Mecnûnê ya li Rojhilatê Besreyê kiriye.
Drona yekem li birca ragihandinê ya qada petrolê ketiye û ya duyem Ofîsa Kompanya KBR`yê ya Amerîkayî hedef girtiye.
Beriya niha jî di 13`ê Adarê de çavkaniyeke ewlehiyê yê parêzgeha Besreyê ragihandibû ku bi 2 dronan êrîşî Qada Petrolê ya Mecnûnê hatiye kirin.
Heman çavkaniyê gotibû ku droneke ku çavkaniya wê ne diyar e, 12`ê Adarê jî li nêzîkî pira boriyan a li Qada Petrolê ya Mecnûnê ketiye.
Qada Petrolê ya Mecnûnê nêzîkî sînorê Îraq û Îranê ye û 60 kîlometreyan dûrî bajarê Besreyê ye.
Ev qada petrolê wekî yek ji qadên herî girîng ên Îraqê tê dîtin.
Mihemed Şiya Sûdanî: Divê sûcdarên êrîşan werin girtin û cezakirin
Derbarê van êrîşan Berdevkê Fermandarê Giştî yê Hêzên Çekdar ên Îraqê Sebah Numan daxuyaniyek belav kir.
Numan diyar kir ku Serokwezîr û Fermandarê Giştî yê Hêzên Çekdar Mihemed Şiya Sûdanî ferman daye hemû dezgehên ewlehî û îstîxbaratê ku li pey sûcdarên êrîşan bigerin û wan radestî dadgehê bikin.
Li gorî daxuyaniyê, di nava çend saetên borî de Qada Petrolê ya Mecnûnê ya li Besreyê, Otela Navneteweyî ya Reşîd û Balyozxaneya Amerîkayê ya li Bexdayê rûbirûyî "êrîşeke terorîstî" bûne.
Sebah Numan got ku; ev karên tawankarî dê encamên xeternak li ser welat bikin û hewlên hikûmetê yên ji bo avakirin û bipêşketinê asteng bikin.
Sebah Numan da zanîn ku Sûdanî tekez kiriye ku ewlehiya dewlet û welatiyan xeta sor e.
Serokwezîrê Îraqê her wiha biryar da ku her fermandar û berpirsê ewlehiyê yê ku di karê xwe de xemsarî kiribe û nekarîbe rê li ber van êrîşan bigire, lêpirsîn pê re were kirin û were cezakirin.
Hat zanîn ku derengiya şeva borî bi dronê êrişî Otela Reşîd a li Bexdayê hat kirin.
Wezareta Karên Navxwe ya Îraqê ragihand ku dron li banê otelê ketiye û tu ziyan çênebûne.
