Tevlî ku Îran di nava şerekî dijwar de ye jî, lê di hundir de û li gorî Saziyên Mafên Mirovan, dewleta Îranê pêleke girtinê dest pê kiriye.
Rojane ji aliyê Saziyên Mafên Mirovan ve, nasname û hijamara kesên ku li Îranê tên girtin, tên ragihandin.
HANA: 33 kes li parêzgehên cuda yên Îranê hatine girtin
Li gorî HANA`yê di 14 û 15`ê adarê de, 33 kes li parêzgehên cuda yên Îranê hatine girtin.
HANA`yê di 14`ê adarê de, nasnameya 2 welatiyên Kurd, Emced Xurşîdî û Sebah Ezîzî, ku ji bajarê Seqezê ne, ji aliyê hêzên ewlehiyê ve hatin girtin, eşkere kir.
Behrûz Çamanara, lêkolînera ziman û wêjeya Kurdî ji bajarê Îlamê, li ser hesabê xwe yê X`ê ragihand ku di 16ê adarê de, hêzên ewlehiyê li bajarê Îlamê bi ser mala malbata wê de girtine, birayê wê Sasan û xwişka wê Parasto girtine û ew birine cihekî nenas.
Tesnîm girtina 55 kesan bi tohmeta sîxuriyê ragihand
Ajansa nûçeyan a Îranê Tesnîm jî, girtina 55 kesan ku wekî ew didêje bi tawana sîxuriya bi dijmin re, ragihand.
HRANA`yê nasnameya 71 girtiyan eşkere kir
Di 17`adarê de ajansa HRANA`yê eşkere kir ku 71 welatî li herêmên cuda yên Îranê, di nav wan de parêzgehên Şahrûd, Yezd, Cem, Hormozgan û Xorasana Rezewî, bi tohmeta "sîxurî" û şandina agahiyan ji medyaya biyanî re hatine girtin.
Ajansa Nûçeyan a Fars girtina 10 kesan li Xorasana Rezewî ragihand û îdea kir ku 4 ji wan bi komkirina agahiyan û destnîşankirina cihên aborî û binesaziyên hesas sîxurî dikirin.
Rêxistina Mafên Mirovan HANA`yê, da zanîn ku veşartina nasnameyên girtiyan, astengkirina gihîştina wan bi şêwirmendiya hiqûqî ya serbixwe û pêşkêşkirina dozên ewlehiyê yên giran bêyî belgeyên giştî, binpêkirinên giran ên prensîbên pêvajoya dadwerî û mafên bingehîn ên mirovan in.
