Li dijî Rêveberiya Xweser, QSD hin aliyên weke Tirkiyê bi êrîşan, bi rêka şaneyên DAIŞê û bi fitneyê taîfî û eşîrî dixwazin li herêmê tevlihêviyê derxînin.
Taybet jî di demeke ku li Tirkiyê behsa çareseriyeke siyasî tê kirin de dewleta Tirk careke din li dijî Bakûr û Rojhilatê Sûrî dest bi êrîşan kir.
Dewleta Tirkiyê û çeteyên wê êvara Yekşemê demjimêr 17:00 dora Bendava Tişrînê û herêmên niştecihên sivîl topbaran kirin.
Lê agahiyên di derbarê encamên topbaranê de nehatin bidestxistin.
Hemwextî vê îrîşê QSDê derbarê êrîş û livûtevgera şaneyên DAIŞê de daxuyaniyek da.
ÊRÎŞÊN DAIŞ LI HERÊMA BAKUR Û ROJHILATÊ SÛRIYÊ ZÊDE BÛNE
https://hawarnews.com/ar/126279
Li gorî daxuyaniyên QSDê, ji destpêka vê salê ve, 114 êrîşên DAIŞê li Dêra Zorê hatine tomarkirin, di nav wan de kemîn, bombekirin û êrîşên rasterast ên li ser xalên kontrolê û wesayîtên leşkerî hene.
Êrîşa herî dawî roja Şemiyê ya borî ji aliyê Hêzên Sûriya Demokratîk ve hate ragihandin, dema ku sê baregehên wan û yên Hêzên Ewlekariya Hundirîn li gundewarê Dêra Zorê hatin hedefgirtin.
Di encamê de şervanek şehîd bû û yên din birîndar bûn.
QSDê dazanîn ku Çeteyên DAIŞ'ê ji destpêka salê ve zêdetirî sed êrîş li bajarê Dêra Zorê ya Bakur û Rojhilatê Sûriyeyê pêk anîne.
Di encamê de 22 şervanên Hêzên Sûriya Demokratîk (QSD)ê, 9 sivîl kuştine û bi dehan jî birîndar kirine.
EŞÎRÊN REQA Û DÊRA ZORÊ: EM PIŞTGIRIYA QSDÊ DIKIN
Li gel êrîşên dewleta Tirk û yên çeteyên DAIŞê, di 26ê Tîrmeha 2025an de, daxuyaniyek li ser navê 133 êl û eşîrên Ereb ên Sûriyeyê hatibû belavkirin.
Di vê daxuyaniyê de dihat îdeakirin ku ev 133 eşîr gef li QSDê xwarine û daxwaza derketina QSDê ji Dêrezor, Reqa û Hesekê kirine.
Eşîrên weke Efadle, Igêdat, Şiêtat, Cibûr, Beggare, Elbûxabûr, Icêl, Fedan, Haşim, Elbû Şeiban, Elbûnasir û Serdiye ku navê wan di lîsteyê de hebûn bi daxuyaniyeke gotin ev daxuyanî sexte ye.
Eşîran li dijî hewildanên tevliheviyê ev bang kirin:
`` Em vê daxuyaniya sexte red dikin û bang li kesên birûmet ên herêmê dikin ku li dijî daxwazên fitneyê haydar bin.
Ev daxuyaniya sexte yekîtiya civakan û aramiya navçeyên me dike armanc. Em careke din teqez dikin ku li gel hêza xwe QSDê ne.``