Di 9'ê Cotmeha 1998'an de li dijî Rêberê Gelê Kurd Abdullah Ocalan komployeke navnetewî pêk hat. Dewleta Tirk, hin dewletên Ewrûpa û hêzên herêmî jî di komployê de cihê xwe girtin. Di encama vê komployê de Rêberê Gelê Kurd Abdullah Ocalan hat girtin û radestî Tirkîyeyê hat kirin.
Li bajarê Cenevreyê li pêşiya Ofîsa NY bi pêşengtiya YJK-S'ê li dijî Komploya Navneteweyî çalakî hat lidarxistin.
Çalakî ji bo bîranîna şehîdên Kurdistanê bi deqeyek rêzgirtinê destpê kir. Piştre li ser navê YJK-S'ê Antina Martîn daxuyanî bi zimanê Fransî xwend.
"Azadiya Ocalan, ne tenê ji bo gelê Kurd, ji bo pêşeroja azad a gelên herêmê jî neçarî ye"
Di daxuyaniyê de Antina Martîn bal kişand ser Komploya Navneteweyî ya 9'ê Cotmehê û got: "Mifteya demokratîkbûna Tirkiyeyê û aştiya mayînde ya Rojhilata Navîn, bi Azadiya Abdullah Ocalan ve girêdayî ye, ne tenê ji bo gelê Kurd, ji bo pêşeroja azad a gelên herêmê jî neçarî ye."
Her wiha jinan piştgirîya xwe ji bo kampanyaya "I Want to Visit Ocalan " "Ez Dixwazim Hevdîtinê bi Abdullah Ocalan re Bikim" ku ji aliyê Platforma Azadî û Aştiyê ya Ewropayê (EFFP) hatibû destpêkirin, ragihandin.
Li ser navê Komîteyê Nejdet Atalay diyarkir ku çalakiyên nobetê yên li Cenevre û Strasbourgê dewam dike û got:
"Îro gelê me li seranserê Ewropayê û li çar parçeyên Kurdistanê, ji bo azadiya Rêber Apo li qadan e û em ê têkokşînê bi vê baweriyê re mezin bikin û bikaranîna hemû mafên xwe yên demokratîk re Rêbertiya xwe azad bikin."
Selma Surer: Me dosya radestî rayedarên NY’ê kirîye
Di dawîyê de berdevka YJK-S’ê Selma Surer ragihand ku ew xwedî li kampanyayê derdikevin û wan wekî 6 meclîs, 5 komun û 3 însîyatîf, dosyayên ku sedemên kampanyaya ‘Ez dixwazim hevdîtinê bi Rêber Apo re bikim’ di nav de bû, radestî rayedarên NY’ê kirine.
"Ev ne tenê serdaneke, îfadeya lêgerîna mirovahiyê ya aştî û edaletê ye.”
Selma Surer êrîşên hikûmeta Veguhêz a di 6’ê Cotmehê de li ser taxên Şêxmeqsûd û Eşrefiyê yên Helebê bi bîr xist û destnîşan kir ku bi van êrîşan wê nikaribin îradeya gelê Kurd bişkînin û ew ê wek jin û dayikên Kurd têkoşîna xwe di her şert û mercî de bidomînin.