Konseya Rêvebir a Kongreya Netewî ya Kurdistanê (KNK) bi boneya salvegera 38’an a Komkujiya Helebçeyê, daxuyaniyeke nivîskî belav kir.
Di daxuyaniyê de KNK’ê wiha got:
"Beriya 38 salan, di 16’ê Adara 1988’an de, hêzên rejîma dagiker a Îraqê, bi çekên qedexekirî yên kîmyeyî û jehrdar komkujiyeke mezin li ser xelkê sivîl ê Helebçeyê pêk anî.
Di encamê de nêzî 5000 zarok, jin, mêr, kal û pîrên bê guneh bûn qubanî û şehîd ketin.
Komkujiya Helebçeyê, bû yek ji zincîra tawanên siyaseta qirkirinê bi destê rejîma dagirker a Baasê ya Sedam li Başûrê Kurdistanê.
"Komkujiya Helebçe êş û birîneke mezin a gelê Kurd e"
Bi kîmyabarankirina deverên Behdînan, Balîsan, Qeredax û Şêxwesanan, komkujiyan dest pê kiribûn.
Komkujiya Helebçeyê, yek ji mînakên herî mezin ên tawankarî yên sedsala 20’an e.
Di navbera çend saetan de, nêzî 5000 hezar kes hatin qetilkirin û hezaran kes jî birîndar bûn.
Helebçe bû êş û birîneke mezin a Gelê Kurd."
Her wiha KNK’ê diyar kir ku dema rejîma Baas desthilat li Îraqê girt, dest bi komkujî û asmîlasyona Kurdan kir.
KNK’ê di berdewamiya daxuyaniyê de got ku ew Helebçeyê qet ji bîr nakin.
Kongreya Netewî ya Kurdistanê di dawiyê de wiha anî ziman:
“Em careke din, di kesayetiya şehîdên Helebçe û Enfalan de, hemû şehîdên Kurdistanê b ibîr tînin û bejna xwe li ber bîranîna wan ditewînîn.”
