Li Tirkiyê, jin ji ber polîtîkayên tepeserkirinê yên ji hêla hikûmetê ve têne sepandin, bi zextên zêde re rû bi rû ne.
Tenê di du hefteyên dawî de, li Stenbolê 8 jinan ji ber şideta mêran, jiyana xwe ji dest dane.
Hevseroka Şaxê Parêzgeha Stenbolê ya DEM Partiyê, Arîfe Çinar ji ajansa ANF'ê re têkildarî rewşa jinan li Bakurê Kurdistan û Tirkiyê axivî.
Arîfe Çinar got: "Em ê bi berxwedan û serhildana xwe li dijî dewleta baviksalar bisekinin."
Arîfe Çinar diyar kir ku ew li dijî polîtîkayên hikûmetê ne: "8'ê Adarê, Roja Jinên Karker ên Navneteweyî ye, rojek e ku têkoşîna jinan ji bo mafên wan li çaraliyê cîhanê nîşan dide.
Hevseroka Şaxê Parêzgeha Stenbolê destnîşan kir ku jin di şert û mercên jiyanê yên ne ewle de dijîn û ji bo debara xwe têdikoşin.
"Ev dem ji bo jinan e"
Hevseroka Şaxê Parêzgeha Stenbolê axaftina xwe wiha domand:
"Em nêzî 8'ê Adarê dibin, lê hîna hin jin hene ku di nav xizanî û şertên zehmet de dijîn."
Arîfe Çinar bal kişand ser şerên ku li Rojhilata Navîn diqewimin û bandora wan li ser jinan:
"Em bi xurtkirina hevgirtin û rêxistina jinan têkoşîna xwe li dijî van pirsgirêkan didomînin.
Mînaka, şoreşa jinan a Rojava bi şekildayîna her aliyê jiyanê bi destên jinan ji bo jinên li çaraliyê cîhanê bûye model û hêz. Ev dem ji bo jinan e."
Wê diyar kir ku daxwazên jinên Kurd ên di 8'ê Adarê de jiyaneke wekhev, azadiya zimanê dayikê û azadiya Abdullah Ocalan dihewîne û wiha axaftina xwe bi dawî kir:
"Ji bo ku jin di şert û mercên wekhev û azad de bijîn, guhertinên zagonî hewce ne.
Jin têkoşînekê dimeşînin da ku li ser vê axê jiyaneke nû, li ser bingeha paradîgmaya rizgariya jinan, ekolojîk û demokratîk ava bikin."
