Hikûmeta Îsraîlê duh biryar da ku pêvajoyeke qeydkirina erdê li Şerîaya Rojava ya Filistînê veke.
Hikûmetê, pêşniyara ku ji hêla sê wezîran ve hatibû pêşkêşkirin, pejirand.
Qeydkirina deverên berfireh li Şerîaya Rojava bi navê dewletê (erdên dewletê) destnîşan dike.
Li gorî biryarê, Desteya Qeydkirina Erdê û Bicihkirinê ya Wezareta Dadê ya Îsraîlê, wê ji bo vê armancê budçeyeke taybet veqetîne.
Serokatiya Filistînê biryarên Îsraîlê red kir û diyar kir ku ev biryar gefê li ser ewlehî û aramiyê wan çêdikin.
Serokatiya Filistînê îlhaqkirina rasterast a axa Filistîn a dagirkirî, ragihandina destpêkirina planên îlhaqkirinê, wekî bidawîkirina peymanên îmzekirî hesiband.
Konseya Aştiyê soz da ku ji bo Xezeyê zêdetirî 5 milyar dolar bistîne
Di vê navberê de, Donald Trump hêviyên mezin ji bo encamên civîna fermî ya yekem a "Konseya Aştiyê" anî ziman, ku wê roja pêncşema bê li Washingtonê bê lidarxistin.
Donlad Trump, got ku dewletên endam soz dane ku ji 5 milyar dolarî zêdetir piştgiriyê bidin hewldanên mirovî û ji nû ve avakirina Xezeyê.
Trump da zanîn ku welatên endam soz dane ku bi hezaran karmend ji bo hêza îstîqrarê peyda bikin ku ji hêla NY ve hatiye avakirin.
Tê payîn ku şandeyên ji zêdetirî 20 welatan, di nav de çend serokên dewlet û hikûmetan, beşdarî civînê bibin.
Amarên Wezareta Tenduristiyê ya Xezeyê nîşan didin ku ji destpêka agirbestê ve zêdetirî 590 Filistînî li Xezeyê ji hêla hêzên Îsraîlê ve hatine kuştin.
Di heman demê de Îsraîl dibêje ku Hemasê di wê heyamê de çar leşkerên wê kuştine.
Konse, welatên Rojhilata Navîn ên wekî Tirkiye, Misir, Erebistana Siûdî, Qeter û Îsraîl û her wiha hêzên derketî yên wekî Endonezya vedihewîne.
Trump ji Hemasê re: Demildest dev ji çekên xwe berde
Serokê Amerîkayê Donald Trump di posta xwe ya li ser platfroma xwe ya Truth Social de diyar kir ku girîng e ku Hemas pabendbûna xwe ya çekberdanê bi awayekî giştî û demildest bi cih bîne.
