Di derbarê rewşa dawî ya taxên Şexmeqsûd û Eşrefiyê de, Rêveberê Rêxistina Mafên Mirovan a Efrînê Îbrahîm Şêxo ji ANF`ê re ev nirxandinan kir.
Îbrahîm Şêxo diyar kir ku tevî di navbera Meclîsa Taxên Şêxmeqsûd û Eşrefiyê û Hikumeta Veguhêz a Şamê de hevpeyman hatiye îmzekirin jî, êrîş û dorpêç didomin û Hikûmeta Şamê hevpeymanê binpê dike.
`Armanca wan ji van binpêkirinan valakirina her du taxan e`
Şêxo diyar kir ku komên çete yên girêdayî Emşat û El Hemzat li derdora taxê bendên xwe danîne û wiha domand: "Di van rojên dawî de jî bendên xwe li derdora taxan zêde kirine û gelek ciwanên Kurd digirin û êşkence li wan dikin. Her wiha li ser wan bendên kontrolê, êşkence li jinekê jî kiribûn. Armanca wan valakirina taxên Şêxmeqsûd û Eşrefiyê ye.”
`Dorpêç dibe sedem ku pêdiviyên jiyanî pêk neyên`
Îbrahîm Şêxo da xuyakirin ku rêya deriyê Dêr Hafir û rêya ku ji Şamê digihêje herêmên Bakur û Rojhilatê Sûriyeyê ji aliyê hikûmeta Şamê ve hatine girtin û ev dorpêç dibe sedem ku pêdiviyên gel ên jiyanî jî pêk neyên."
`Eger dorpêç dewam bikin wê rewş zehmetir bibe`
Rêveberê Rêxistina Mafê Mirovan a Efrînê Îbrahîm Şêxo wiha axaftina xwe bi dawî kir: "Îro erka sereke ya ku ji saziya mafê mirovan tê xwestin ew e ku ev kiryar û binpêkirinên ku tên kirin belge bikin. Her wiha van belgeyan bigihînin komîteyên lêpirsîna navdewletî û li wir edalet pêk were, yan jî wê rewş ber bi aloziyek zehmetir ve biçe."
Komên girêdayî Hikûmeta Veguhêz a Şamê di 6`ê Cotmehê de li ser taxên Şêxmeqsûd û Eşrefiyê yên Helebê dorpêç meşandibûn û ciwanên Kurd revandibûn. Şêniyên her du taxan ji bo rakirina dorpêçê xwepêşandanan li dar xistibûn.
Hêzên girêdayî Hikûmeta Veguhêz bi guleyan êrîşî şêniyan kiribûn û gelek welatî birîndar bûbûn.
