Şeveke tije êrîş, bombebaran û mûşekbaran bi ser Îran û Rojhilatê Kurdistanê re derbas bû.
Li ser maseyên dan û standinê û di konferansên çapemeniyê yên diplomatkaran de behsa nêzîkbûna aştî û lihevkirinê tê kirin, lê li navendên leşkerî û li qadên şer general, Kolonêl, Sipehbûd û Serheng zimanê hêza çekdarî bi kar tînin.
CENTCOM: Armanca me ji êrîşê parastina hêzên me bû
Fermandariya Navendî ya Artêşa Amerîkayê CENTCOM`ê ragihand ku hêzên wan, li başûrê Îranê êrîşî ser hêzên deryayî û navendên mûşekî yên Îranê kirin.
CENTCOM, dibêje armanca wan ji vê êrîşê, parastina hêzên Amerîkî ji her gef û metirsiyeke hêzên Îranê ye.
Êrîşî ser navenda PAK'ê ya li nêzîkî Hewlêrê hat kirin
Di heman şevê de jî êrîşî ser navenda partiyeke Rojhilatê Kurdistanê li navçeya Dareşekranê ya girêdayî Hewlêrê hat kirin.
Malpera fermî ya Partiya Azadî ya Kurdistanê PAK`ê ragihand ku di demjimêr 21:20 de navenda Supayê Milî yê Kurdistanê bi mûşekên balsîtîk û dronan ji aliyê Komara Îslamî ya îranê ve hat hedefgirtin.
Di êrîşê de 9 Pêşmerge birîndar bûn
Di encama êrîşê de 9 Pêşmerge birîndar bûn û birînên 4 Pêşmergeyan giran in.
Partiya Azadî ya Kurdistanê eşkere kir ku ji destpêka şerê Amerîka-Îsraîl û Îranê ve û heta niha, 71 caran êrîşî ser navendên wan hatiye kirin, 2 Pêşmergeyên wan jiyana xwe ji dest dane û 17 Pêşmergeyên din jî birîndar bûne.
