Hevdîtinên li ser plana Xezzeyê li Misrê dewam dikin
Çavkaniyên El Erebiya û El Hadath ragihandin ku di navbera danûstandkarên li Şarm el-Şêx de pirsgirêkên çaresernebûyî hene, Hemas daxwaza berdana endamên elît wekî beşek ji peymana pevguhertina girtiyan û şeş rêberan dike, di nav wan de Merwan Barxûtî û Ehmed Seadat jî hene.
Her wiha Hemas daxwaz dike ku Îsraîl ji deverên niştecihbûyî vekişe da ku girtiyan û termên wan radest bike û piştî radestkirina girtiyan Serokwezîr Benjamin Netanyahu venegere şer.
Li gorî çavkaniyan, nexşeyên vekişîna Îsraîlê di qonaxên peymanê de jî hîn nehatine çareserkirin.
Hemas: Divê rojane 400 kamyon derbasî Xezzeyê bibin
Çavkaniyên El Erebiya û El Hadath destnîşan kirin ku vegerandina termên girtiyan wê ji dema ku di plana Trump de hatiye destnîşankirin dirêjtir bidome
Li gorî çavkaniyên wan, Hemas daxwaz dike ku rojane 400 kamyonên alîkariyan bikevin Şerîda Xezzeyê.
Qeter, Dewletên Yekbûyî yên Amerîkayê û Tirkiye, digel Misrê ku mazûvaniya hevdîtinan li Şarm el-Şêx dike, di roja sêyemîn a hevdîtinan de beşdar dibin.
Serokwezîr û Wezîrê Derve Şêx Mihemed bin Ebdulrehman El-Tanî, serokê îstîxbarata Tirkiyê Îbrahîm Kalin, nûnerên Trump Steve Witkoff û Jared Kushner û Wezîrê Karûbarên Stratejîk ê Îsraîlê Ron Dermer jî gihîştin Şarm el-Şêx. Serokê îstîxbarata Misrê jî tevlî hevdîtinan bû.
Berî wê, Serokê Amerîkayê Donald Trump gotibû ku du rojên bê de, di derbarê vegera girtiyan û bidawîanîna şerê li Xezeyê de pir girîng bin.
Serokê Amerîkayê got ku "derfetek rastîn" heye ku li Xezeyê peymanek aştiyê were çêkirin.