Kabîneya Hikûmeta Tirkiyê bi serokatiya Recep Tayyîp Erdogan duh li Enqereyê civiya û piştî civînê Erdogan daxuyaniyek da.
Erdogan eşkere kir ku ew rê nadin siyaseta nefretê û îdia kir ku Tirkiyê rêjeya bicihanîna biryarên Dadgeha Mafên Mirovan a Ewropayê (DMME) ji sedî 90'e û ev rêje ji ya welatên din zêdetir e.
Her çend Erdogan dibêje, "Em biryarên Dadgeha Mafê Mirovan a Ewropayê bi cîh tînin" jî li welêt tişta tê jiyîn berovajî vê yekê ye.
DMME'yê beriya mehekê cara seyemîn di derbarê Hevserokê berê yê HDP'ê Selehatîn Demîrtaş de ku ev 9 sal in girtî ye biryar girtibû ku mafê wî hatiye binpêkirin û daxwaza berdana wî kiribû.
Her wiha dadgeh gotibû "girtina Demîrtaş madeyên 5'emîn û 18'emîn ên Peymana Mafên Mirovan a Ewropayê bin pê dike û tekez kiribû ku ev girtîbûn bi sedemên siyasî berdewam dike."
Li gel zextên sîyasî û biryara dadgehê jî Demîrtaş nayê berdan û hê jî di zinadanê de girtî ye.
Her wiha ne tenê Demîrtaş, li Tirkiyê ji bo Osman Kavala, Can Atalay û yên di heman rewşê de li gel biryarên DMME û Dadgeha Destûrî ya Tirkiyê biryarên dadgehan tên paşguhkirin.
