Li gorî ajansa dewetê ya Îranê Îsna, wezîrê derve yê Îranê Ebbas Eraqçî ragihand ku welatê wî der barê dosyaya nuklerî de wê bi Amerîkayê re danûstandinan neke û wiha da xuyakirin:
“Tehran ji bo rûbirûbûna hemû senaryoyan amade ye.”
Ebbas Eraqçî got ku Îran, piştî şerê 40 rojî yê bi Amerîka-Îsraîlê re, pir hatiye guhertin û Tehran li hember mezintirîn hêza leşkerî li ber xwe da û wiha axivî:
“Dijmin ji xwe re dihizirî ku Îran lawaz bûye, lê di dema şer de dît ku Îran li hember mezintirîn hêza çekdar a cîhanî û du hêzên nuklerî li ber xwe da û planên wan têk birin.”
Her wiha Eraqçî der barê Tengava Hurmizê de ev yek anî ziman:
“Em li ser amadekirina mekanîzmayekê ji bo birêvebirina Tengava Hurmizê dixebitin û rewşa li tengavê venagere weke berê û em ê rê nedin ku keştiyên dijmin derbas bibin.”
Di heman demê de, wezîrê karê derve yê Îranê Ebbas Eraqçî diyar kir ku Îran pabend e agirbestê li Libnanê misoger bike.
