Serokê Hikûmeta Veguhêz a Sûriyê biryanameya sala 2025'an bi hejmara 188'an der barê roj û cejnên fermî de derxist.
Di biryarnameyê de gelek roj û cejnên gelê Kurd û gelên din ên Sûriyê hatin paşguhkirin.
Di biryarnameyê de Cejna Newrozê ku di roja 21'ê Adarê de ye, nehatiye destnîşankirin û li şûna wê biryara rejîma Baasê ku roja 21'ê Adarê kiribû Roja Dayikan, hatiye bicîkirin.
UNESCO'yê Newroz xistiye nav lîsteyên mîrateya çandî ya mirovahiyê
Rêxistina Neteweyên Yekbûyî ya Perwerde, Zanist û Çandê UNESCO di 2010´an de, Newroz xist nav lîsteyên Mîrateya Çandî ya Nemadî ya Mirovahiyê û 21'ê Adarê wekî rojeke navneteweyî ji bo pîrozkirina Newrozê, destnîşan kiribû.
Hikûmeta veguhêz şopa rejîma berê ya Sûriyê didomîne
Hikûmeta Veguhêz jî, şopa rejîma berê ya Sûriyê didomîne ku di sala 1988`an de biryarnameya bi hejmara 104`an derxistibû û 21`ê Adarê wekî "Roja Dayikan" nîşan dabû.
Di biryarnameya nû de jî, cejna Akîto, cejna neteweyî ya Suryanî, Asûrî û Kildaniyan ku her sal di 1'ê Nîsanê de tê pîrozkirin û yek ji kevintirîn cejnên dîroka mirovahiyê ye, hatiye paşguhkirin.
Di biryarnameya nû de roja şehîdan hat tunekirin
Hikûmetê çend rojên neteweyî yên din ên Sûriyê jî paşguh kirine; bi taybet Roja Şehîdan ku di 6'ê Gulanê de tê pîrozkirin, roja ku Osmaniyan gelek rewşenbîr û çalakvanên Sûriyê li Qada Mercê ya Şamê bi darve kiribûn.
Di girtîgehên Hikûmeta Veguhêz de 58 kes hatine kuştin
Di dema ku Hikûmeta Veguhêz a Sûriyê van biryaran derdixe, Navenda Çavdêriya Mafê Mirovan a Sûriyê (SOHR)`ê ragihand ku di girtîgehên Hikûmeta Veguhêz de bi dehan girtî hatine kuştin û çarenûsa bi hezaran girtiyên din ne diyar e.
SOHR`ê destnîşan kir ku navên 58 girtiyên di girtîgehên Hikûmeta Veguhêz a Sûriyê de yên ku hatine kuştin, hatine belgekirin.
Li girtîgehên cuda yên Hikûmeta Veguhêz a Sûriyê 8 hezar girtî hene
Her wiha li gorî agahiyan jî, ji zêdetirî 9 mehan ve li girtîgehên Hema, Hums, Edra ya Şamê, Harim a Hemayê, Efrîn û Raî ya Helebê 8 hezar girtî hene.
SOHR`ê da zanîn ku girtî di şert û mercên dijwar de dijîn û ji mafên xwe yên rewa, wekî xwarinê bêpar hatine hiştin.
Her wiha ji bo başkirina rewşa jiyana girtiyan, pere ji malbatên wan tên xwestin.