Li gorî Ajansa Nûçeyan a Îranê, girtiyê bi navê Kerîm Keramî yê 57 salî ku ji parêzgeha Kirmaşanê ye, li Zindana Dîzel Abad a Kirmaşanê hat bidarvekirin.
Berî bidarvekirinê, ew li Beşa 8’an a Zindana Kirmaşanê dihat girtin.
Heta dema nivîsandina vê raporê, bidarvekirina vî girtiyî bi fermî ji aliyê rayedarên girtîgehê û saziyên berpirsiyar ve nehatiye ragihandin.
Her wiha li gorî heman çavkaniyê, girtiyê bi navê Rehîm Xanalî jî îro li Zindana Adel Abad a Şîrazê hat bidarvekirin.
Werîşe Muradî tev li rûniştina dozê nebû
Ji aliyekî din ve, piştî ku careke din girtiya siyasî Werîşe Muradî ji bo dadgeha Şoreşê ya Tehranê hat vexwendin, bi sedema ku dadgeh bi fermî neyê naskirin, Werîşe Muradî tev li rûniştinê nebû.
Werîşe Muradî, ji 20’ê tebaxa 2023’yan û vir ve, di girtîgehê de ye.
Girtiya Kurd Werîşe Muradî, ji aliyê Şaxê 15’an a Dadgeha Şoreşê ya Tehranê ve, bi tawana "serhildanê" cezayê bidarvekirinê lê hatibû birîn.
