Tevî ku kontrola xwe ya li ser herêman wenda kir, rêxistina DAIŞ hîn jî çalak dimîne, taktîkên êrîşên hevdem û ketina ji Çolistanê bo gundewar û hundir bi kar tîne.
Zêdebûna liv û tevgera şaneyên DAIŞê îşaretên gûhertinên taktîkê yên rêxistina terorîst a tundrew dide.
Rojnamevan Zana Omer di wê baweriyê de ye ku kaolsyoneke grûpên “Seraya Ensar El-Sunna” û “Hurras El-Dîn” bi DAIŞ re çêbûye û bawer dike ku DAIŞ navê xwe biguhere û wek rêxistineke nû derkeve holê.
Her wiha dibêje: “Eger QSD’ê roleke sereke nelîze, dê li Sûriye şerê navxweyî û terorê nû bibe. Di heman demê de dê metirsî li ser kêmahiyên olî û mezhebî zêde bibin.”
`DAIŞ di qonaxa 4an de ye`
DAIŞ li naverasta Îraqê li sêgoşeya Neynewayê ya ku li ser Çolistana Sûriyê vekiriye, pir aktîv bûye. Li Sûriyê jî, piştî ku çolistan û herêmên dagirkirî heta 2024an jê re bûbû hêlîn. Taybet ji hilweşîna rejîma Baas û hatina HTŞê sûd wergirt.
Zana Omer da zanîn ku DAIŞ ketiye qonaxa çaran a piştî sala 2019an û bi guhertina neqşerêya kontrolê ya Sûriyê re, li gundewarên paytexta Sûriyê Şamê, naverasta Sûriyê, Idlib, Hema û Humsê xwe birêxistin dike.
Di 2025an de çi hat guhertin?
Omer destnîşan dike ku piştî tevliheviyên dawî yên dramatîk li Rojhilata Navîn êdî hinek faktor hatin guhertin û tevîlbûna di nav refên DAIŞê de zêde bû.
Rojnamevan û Pisporê Karûbarên Komên Tundrew da zanîn ku siyaseta Colanî ya nû hişt ku komên tundrew ên selefî ji wî veqetin û tevlî refên DAIŞê bibin, hemû nîşane tên wateya ku êdî jimara endamên wê zêde bûye û ew nêzî karîna xwe ya 2014an bûye.
DAIŞ di qonaxa nû de zêde êrîşan nake di hundirê Sûriyê de, dibe ku li hêviya hin guhertinên dramatîk e û derfet dide alîgirên Colanî ku jê veqetin û tevlî wê bibin. Ew hêza xwe bi giştî li dijî QSDê bikar tîne.
`Divê li Sûriyê QSD bibe hêza sereke ya dijî terorê`
QSD’ê rola sereke ya şerê li dijî DAIŞ’ê dike bi hevkariya Koalsyona Navdewletî. Zana Omer dibêje tevî ku operasyonên hevbeş ên QSDê û koalsyonê sînorê Bakur û Rojhilatê Sûriyeyê derbas kirine, lê têrê nake.
Ew tekez dike ku divê QSD fermî wek hêzeke sereke ya navendî ya şerê dijî DAIŞê di hundir Wezareta Berevaniya Sûriyê werê nîşankirin û çareya siyasî dest pê bike.
Zana Omer tekez dike ku diyaloga di navbera Qamişlo û Şamê de gavek erênî ye, ne tenê ji bo Sûriyê, belê ji bo welatên derdor mîna Iraq, Urdun, Îsraîl û ji bo Tirkiyê jî eger Tirkiye siyasetên xwe li hember Kurdan biguhere û tevlî pêvajoya aştiyê bibe.