Şerê di navbera Amerîka-Îsraîl û Îranê de, her ku diçe gurtir dibe.
Ev şer zirarên mezin dide Îraq û Başûrê Kurdistanê.
Her roj li gelek herêman êrîşên bi dron û mûşekan çêdibin.
Asmanê Hewlêrê, careke din bû hedefa dronên komên çekdar ên ku berpirsên Îraq û Herêma Başûrê Kurdistanê navê "komên derveyî qanûnê" li wan dikin.
Di demjimêr 12:00`ê şeva borî de dronekê banê kafeteryayekê li kolana Îskanê qul kir û li nav kafeteryayê ket.
Zirarên madî çêbûn, lê ji ber ku dron neteqiya, hemû kesên ku wê demê li kafeteryayê bûn bi silametî jê derketin.
Xwediyê kafeteryayê, bangî hikûmeta Îraqê û Serokwezîr Mihemed Şiya Sûdanî kir ku wan koman kontrol bikin û êdî bes be.
Li gorî agahiyan, tenê şeva borî nêzîkî 30 dron û mûşek avêtine Hewlêrê.
3 çekdarên Heşda Şeibî li Teleferê hatin kuştin
Her wiha Desteya Heşda Şeibî ragihand ku di êrîşa duh a li ser baregeha lîwaya 53`an a hêzên Heşdê ya li Teleferê ya girêdayî Mûsilê, 3 çekdarên wan hatin kuştin.
Yek ji çekdarên ku hatin kuştin, fermandarê fewca "Mexawîr" a lîwayê Yasîn Mihemed Sadiq bi nasnav Ebû Taha Turkmenî bû.
Li gorî heman agahiyan, şeva borî jî baregeha fewca 4`an a bi ser lîwaya 14`an a li Nînewayê hate bombebarankirin, lê ti ziyanên canî çênebûne.
