Piştî 9 salan ji koçberiya bi darê zorê, xelkên Efrînê vedigerin ser mal û milkên xwe.
Li Kobanê di saetên sibehê de koma yekem a koçberan ji bajarê Kobanê ber bi Efrînê ve bi rê ket.
Şandeyek ji Hikûmeta Veguhêz a Sûriyê, Cîgirê Fermandarê Hêzên Ewlekariya Hundirîn a parêzgeha Hesekê Siyamend Efrîn, Hevseroka Gerînendeya Têkiliyên Derve ya Rêveberiya Xweser Îlham Ehmed û şandeyeke rêveberiya Kobanê amade bûn.
Beriya ku karwanê koçberan bi rê bikeve, rêveberê Herêma Kobanê Îbrahîm Mislim û Hevseroka Rêveberiya Xweser a Kobanê Mizgîn Xelîl daxuyanî dan.
Her wiha di daxuyaniyan de hate gotin ku bi biryar e hemû koçber beriya Cejna Qurbanê vegerin ser mal û milkên xwe.
Yek ji xalên ku peymana 29`ê çileyê di nav xwe de vedihewîne, vegera koçberên herêmên dagirkirî ye.
Hêjayî bi bîrxistinê ye ku koma yekem a ku ji nêzîkî 400 malbatî ve pêk dihat di 9`ê Adara îsal de, koma duyem a ku ji nêzîkî 200 malbatî ve pêk dihat di 4`ê Nîsanê de, koma sêyem a ku ji nêzîkî 800 malbatên koçber ve pêk dihat di 14'ê Nîsanê de û koma çarem a ku ji hezar malbatî ve pêk dihat di 10ê gulanê de gihîştin Efrînê.
Herî dawiyê jî, Koma pêncemîn a ku ji herêma Cizîrê derket, di 11ê gulanê de gihîşt Efrînê, ev karwan ji hezar malbatî pêk dihat.
Koma yekem a ku îro ji Kobanê çû, di saet 16`an de, piştî nîvro gihîştin Efrînê.
