Bi boneya 1'ê Gulanê, Roja Karkeran a Cîhanê li her çar perçeyê Kurdistanê bi daxuyaniyên cur bi cur hat pîrozkirin.
Her wiha li Ewropayê jî bi boneya vê rojê piştgiriya karkeran hat kirin.
KCD-E: Divê em ji her demê hîn xurttir bibin yek
Kongreya Civakên Demokratîk a Kurdistaniyên li Ewropayê KCDK-E’yê bi wesîleya 1’ê Gulanê, Cejna Karkeran a Cîhanê bi vê peyamê pîroz kir:
"Divê em ji her demê hîn xurttir bibin yek.
Bi hev re tevbigerin û li dijî modernîteya kapîtalîst tifaqeke navneteweyî ya bindestan ava bikin.
Ji bo aştî, azadî û jiyaneke bi rûmet têkoşîna hevpar, rêya esas a banga me ye."
TJA: Têkoşîna me bi biryardarî mezin dibe
Li Bakurê Kurdistanê jî Tevgera Jinên Azad (TJA), Partiya Herêmên Demokratîk (DBP) û Partiya Wekhevî û Demokrasiyê ya Gelan (DEM Partî) bi boneya 1’ê Gulanê daxuyaniyên niviskî weşandin.
TJA’yê di daxuyaniya xwe de destnîşan kir ku daxwaza wan jiyaneke bêtundî ya aştiyane ye û got:
"Li dijî her cure mekanîzmayên zextê, bêhiquqiyê û êrişên zayendperestiyê, têkoşîna me bi biryardarî mezin dibe."
DBP: Serketina pêvajoyê dê bibe serketina kedkaran
Di heman demê de DBP’ê jî bi boneya vê rojê ev peyam da:
“Serketina pêvajoyê dê bibe serketina kedkaran.
Em bi ruhê Newrozê, qadên 1’ê Gulanê pîroz bikin û siyaseta demokratîk mezin bikin.”
Ne tenê Partiya Herêmên Demokratîk (DBP) di heman çarçoveyê de DEM Partiyê jî balkişand ser keda karkeran û ev tişt anî ziman:
“Ji bo cîhaneke ku kedxwarî, xespkirina heq lê nebe û edalet û wekhevî lê serdest be, em ê têkoşîna xwe bibiryar bidomînin.
Îro û her tim em ê li gel karker û kedkaran bin.”
TEV DEM: Karker stûna pêşkeftin û avakirinê pêk tînin
Li Rojavayê Kurdistanê jî Tevgera Civaka Demokratîk (TEV-DEM) û Yekîtiya Kedkaran a Kobanê bi daxuyaniyeke hevpar en roj li hemû kedkaran pîroz kirin û gotin:
"Karker stûna pêşkeftin û avakirinê pêk tînin.
Hewldanên rojane yên berdewam ên çîna karker çavkaniya serbilindî û rûmetê ne.
Em hemû qurbaniyên ku di dîrokê de ji bo edaleta civakî, azadî û rûmetê hatine kirin bi rêzdarî bi bîr tînin.''
KJK: 1’Ê Gulanê soza avakirina ked berxwedanê ye
Koordînasyona KJK'ê jî îşaret bi têkoşîna hevpar a kedkarên cîhanê kir û ev tişt di daxuyaniyê de bi bîr anîn:
"1’ê Gulanê, ne tenê roja pîrozbahiyê ye, di heman demê de "soza avakirina ked, berxwedan û jiyana sosyalîst e."
Nêçîrvan Barzanî: Em piştgirya tam didin karkeran
Li Başûrê Kurdistanê jî Serokê Herêma Kurdistanê Nêçîrvan Barzanî, ji bo 1ê Gulanê Roja Cîhanî ya Karkeran peyamek belav kir û got:
“Em di vê rojê de piştgiriyeke tam a ji bo maf û daxwazên rewa yên karkeran didin.
Em alîgir in li ser pêdiviya pêbendbûna tam a bi yasaya kar û dabînkirina jîngeheke ewle, ku hemû mafên karkeran diparêze.
Divê jiyan û debareke hêja ji bo wan were dabînkirin.”
