Zanîngeha Rojava li ser nêzîkbûna sala nû ya xwendinê û nediyariya çarenûsa pêvajoya entegrasyonê daxuyaniyek belav kir. Di daxuyaniyê de hat diyarkirin ku di nava şert û mercên giran ên şer û ambargoyê de, bi kedeke mezin azmûneke 10 salan a zanistî hatiye avakirin û nabe ku ev tecrube were paşguhxistin.
Rêveberiya zanîngehê bal kişand ser tengbûna demê û diyar kir ku derengmayîna di biryaran de ne di berjewendiya bi hezaran xwendekar û mamosteyan de ye. Hat tekezgirin ku ji aliyê pedagojîk û hiqûqî ve sepandina guhertinên ji nişkê ve û bi awayekî navendî ne rast e. Ji bo serkeftina vê pêvajoyê, hat diyarkirin ku "pêvajoya entegrasyonê demeke dirêj û têrker dixwaze û divê bi nîqaş, diyalog û rêzgirtina li taybetmendiyên herêmê bimeşe."
