Hemwextî êrîşên Amerîka-Îsraîlê yên li dijî Îranê, mijara agirbestekê yan jî bidawîbûna şer di rojevê de ye.
Şevê din serokê Amerîkayê Donald Trump behsa bidawîbûna şerê li dijî Îranê kir.
Donald Trump, diyar kir ku welatê wî dikare di nava du-sê hefteyan de, êrîşên xwe yên leşkerî li dijî Îranê rawestîne û got:
"Tehran ne mecbûr e ku wekî pêşşertek ji bo kêmkirina aloziyê peymanekê îmze bike."
Trump eşkere kir ku ew ê pir zû derkevin; vekişîn dikare di nav du hefteyan de jî pêk were û wiha got:
"Îran ne mecbûr in ku bi min re peymanekê bikin."
Berê, Waşingtonê gef xwaribû ku eger Tehran çarçoveyek 15 xalî ya Amerîkayê ji bo agirbestê qebûl neke, ew ê operasyonên leşkerî dijwartir bike.
Di nav daxwazên bingehîn de ev jî hebû ku Îran soz bide ku çekên nukleerî neşopîne, hemî çalakiyên dewlemendkirina uranyûmê rawestîne û Tengava Hurmizê bi temamî ji nû ve veke.
