Serokê Amerîkayê Trump dixwaze bi rêya navbeynkarîya xwe alozîya li Sûdanê çareser bike.
Trump çend roj berê got ku ew ê mudaxele bike da ku pevçûna di navbera artêş û Hêzên Piştgiriya Lezgîn (RSF) de rawestîne.
Şer di Nîsana 2023an de wekî encameke têkoşîna desthilatdariyê derket.
Şerê kambax li welêt bû sedema birçîbûn, kuştin, qirkirina etnîk û koçberîya girseyî.
Wezîrê Derve yê Amerîkayê Marco Rubio bi dûv Trump re got ku Washington dixwaze berî sersalê şer û pevçûnan bi dawî bike.
Marco Rubio di civîneke çapemeniyê de diyar kir ku hin welat çek û amûran didin aliyên şer.
Rubio diyar kir ku rêveberiya Serok Donald Trump bi aliyên têkildar re di têkiliyê de ye.
Wezîrê Derve vê înformasyonê da çapemenîyê: "Me bi hemî aliyên pevçûnê re axaftinên rast û guncaw kirin. Ji ber ku bêyî piştgiriya wan, tu alî nikare berdewam bike."
Marco Rubio eşkere kir ku bi Amerîka bi Îmaratên Ereb, Erebistana Siûdî re û bi Misrê re axivî ye.
Bi taybetî, Îmaratên Ereb bi desteka xwe ya mezin a ji bo RSFê tê tawanbarkirin.
Lêbelê rêveberîya vî welatî tevî gelek delîlên heyî jî vê yekê înkar dike.
Hêjayî gotinê ye, di şerê navxweyî yê Sûdanê de heta niha di navbera 150 û 400 hezarî de mirov hatine kuştin û 12 milyon kes terka welêt kirine.
