Serokê Amerîkayê Donald Trump, li Qesra Spî di dema îmzekirina fermaneke rêveberiyê de, daxuyaniyên girîng li ser Îranê û ewlehiya herêmê dan.
Trump bang li welatên Kendavê kir ku ji bo parastina Tengava Hurmizê alîkariya Dewletên Yekbûyî yên Amerîkayê (DYA) bikin.
"Îranê hejmareke mezin ji xwepêşanderan kuştiye"
Trump di axaftina xwe de bal kişand ser xwepêşandanên li Îranê û Hikûmeta Îranê bi tundûtûjiyê tawanbar kir.
Trump diyar kir ku reftara desthilatdariya Îranê ya li hemberî gelê xwe "bêwijdanî" ye û got:
"Tiştê ku ew dikin pir bêwijdan û bêaqil e, û wan bi gel re pir xirab reftar kiriye.
Bi qasî ku em dikarin bibêjin, wan heta niha 52,000 xwepêşander kuştine.
Dibe ku hejmara mirinan zêdetir be jî.
Ev rewşek pir cidî ye, lê Dewletên Yekbûyî yên Amerîkayê dê di demek nêzîk de rewşê kontrol bike."
Serokê Amerîkayê Donald Trump ragihand ku welatê wî dê êrîşên xwe yên li ser şiyanên serbazî û stratejîk ên Îranê yên li herêma Tengava Hurmizê bidomîne û wiha got:
"Em ê hemû şiyanên wan ên di her tiştê ku bi Tengava Hurmiz ve girêdayî ye de ji holê rakin."
Trump: Karbidestên Îranî mirovên pir bêbawer in
Li aliyekî din Trump di hevpeyvînekê de bi Salem News re, rexneyên tund li ser peymana li gel Îranê girtin û destnîşan kir ku Tehran qet pabendî sozên xwe nebûye û got:
"Peymana bi Tehranê re ji bo ceribandina aliyê din hatibû çêkirin.
Dema ku hûn bi sextekaran re mijûl dibin, peyman ne pir hêja ye.
Karbidestên Îranî mirovên pir bêbawer in û bi rastî, heke ew qet çekek navokî bistînin, ew ê di nav rojekê de bikar bînin."
Trump eşkere kir ku peymanek ku hema hema %100 bi dawî hatibû, ji aliyê şandeya Îranê ve di kêliya dawî de hatiye hiştin û got:
"Ev kes bi rastî dîn in. em gihîştibû rêkeftinekê ku her tişt di berjewendiya me de bû, lê ew bi bingehîn peymanan binpê dikin."
Ebbas Eraqçî: Trump rast e lê ji sedî 20 pir zêde ye
Li hemberî van daxuyaniyan, Wezîrê Karên Derve yê Îranê Ebbas Eraqçî bertekek nîşan da.
Eraqçî li ser tora civakî X nivîsand ku Donald Trump di derbarê stendina xercê ji bo dabînkirina ewlehiyê ji keştiyên ku di Tengava Hurmizê re derbas dibin de "bi tevahî rast" e.
Eraqçî diyar kir ku her kesê ku ewlehiya keştiyên bazirganî yên li Tengava Hurmizê peyda dike divê ji bo vê xizmetê pere werbigire û tekez kir ku Îran her gav parêzvanê vê tengavê bûye û dê "her û her" wisa bimîne.
Lê belê, Eraqçî li ser pêşniyara standina bac an xercê ji sedî 20 ji barhilgirên transît re nerazîbûn nîşan da û got:
"Ji sedî 20 pir zêde ye; em ê adil bin."
