هەڵۆ ئەحمەد گرێدەر، پێشمەرگەی دێرین و زیندانیی سیاسیی پێشوو کە ئێستا دانیشتووی دانیمارکە، لە درێژەی چالاکییە وەرزشی و شاخەوانییەکانیدا گەیشتە زنجیرە چیاکانی هیمالایا و ئاڵای کوردستانی لەسەر بەرز کردەوە.
ناوبراو کە تەمەنی ٥٩ ساڵە، لە لێدوانێکدا ئاماژەی بەوە دا کە گیانی خەبات و پێشمەرگایەتی هێشتا لە گیانیدا ماوە، بەڵام شێوازی خەباتەکەی گۆڕیوە و بڕیاری داوە لە هەر شوێنێک و بەسەر هەر شاخێکدا سەربکەوێت، ئاڵای کوردستان لەگەڵ خۆی هەڵبگرێت.
هەڵۆ ئەحمەد ڕوونیشی کردەوە کە ئەوان توانیویانە بگەنە یەکەم خاڵی جێگیر لە دامێنی چیای ئێڤرێست، بەڵام بەهۆی خراپی و مەترسیی کەشوهەواوە، لەلایەن تیمە پەیوەندیدارەکانەوە ئاگادار کراونەتەوە کە بگەڕێنەوە و بۆیە نەیانتوانیوە درێژە بە گەشتەکەیان بدەن. ناوبراو لە ڕێگەی گرتە‌یەکی ڤیدیۆییەوە دیمەنی گۆڕستانەکانی دامێنی چیای ئێڤرێستیشی تۆمار کردووە.