هاوسەرۆکایەتیی کۆما جڤاکێن کوردستان (کەجەکە) لە ڕاگەیەندراوێکدا تەواوی ئەو دەنگۆیانەی ڕەتکردەوە کە لە میدیاکانی تورکیادا لەبارەی دەرکردنی "یاسای چوارچێوە" بۆ پڕۆسەی چارەسەری بڵاودەکرێنەوە، و ڕایگەیاند کە ئەوان هیچ جۆرە بڕیار و یاسایەکی سەپێندراو قبووڵ ناکەن.
کەجەکە ئاماژەی بەوە کردووە، هەر هەوڵێک بۆ دەرکردنی یاسایەکی نوێ بەبێ ڕاوێژکردن لەگەڵ عەبدوڵڵا ئۆجالان و بزووتنەوەکەیان، وەک پیلانگێڕی و سەپاندن دەبینن.
ڕاشیگەیاندووە کە ئەو بابەتانەی لە میدیاکانی تورکیادا بڵاودەکرێنەوە لەگەڵ کرۆکی پڕۆسەی ڕاستەقینەی چارەسەریدا ناگونجێن، و دەسەڵاتی تورکیا دەیەوێت ئەو پێشنیازانەی کە ئۆجەلان لە دیداری 24ـی ئایاردا پێشکەشی کردبوون، بە لاڕێدا ببات و وەها نیشانیان بدات کە بابەتێکی نوێن.
جەختیشی لەوە کردووەتەوە کە دوای دیداری 24ـی ئایارەوە، چیدی هیچ دیدار و پێوەندییەک لەگەڵ عەبدوڵا ئۆجالاندا ئەنجام نەدراوە، گۆشەگیریی توندی سەر ناوبراو لە زیندانی ئیمراڵی وەک خۆی بەردەوامە و هیچ ڕێکارێکی نوێ لەو بارەیەوە جێبەجێ نەکراوە.