پرۆفیسۆر بولەنت بیڵمەز، ئەکادیمیستی ناسراوی کورد، دوای ٢١ ساڵ لە کارکردن و توێژینەوەی زانستی، بە بڕیاری ئیدارەی نوێی زانکۆی بیڵگیی ئەستەنبوڵ لە پۆستەکەی دوورخرایەوە، ئەمەش وەک درێژکراوەی ئەو شەپۆلە گوشارە نوێیەی کە لەم دواییانەدا ڕووبەڕووی ناوەندە ئەکادیمی و ڕۆشنبیرییەکانی تورکیا بووەتەوە.
پێشتر توونجەر باکرهان، هاوسەرۆکی گشتیی دەم پارتی، لە چوارچێوەی ڕەخنەگرتن لە دۆخی نائاسایی و شەپۆلی دەستگیرکردنەکانی ئەنقەرە، ئاماژەی بە ناوی پرۆفیسۆر بولەنت بیڵمەز کردبوو و ڕایگەیاندبوو کە ناوبراو تەنیا بەهۆی ناسنامە و بابەتە ئەکادیمییەکانیەوە کراوەتە ئامانج.
بیڵمەز لە ڕاگەیەندراوێکدا ئاشکرای کرد کە ئیدارەی قەیومی زانکۆکە (کە ساڵێکە دەستی بەسەر بەڕێوەبردنی زانکۆی بیڵگیدا گرتووە)، بەبێ نیشاندانی هیچ پاساوێکی فەرمی و گونجاو کۆتایی بە خزمەتەکەی هێناوە؛
ئەمە لە کاتێکدایە کە لە ڕابردوودا بەردەوام لەلایەن کارگێڕیی زانکۆوە ستایشی کارەکانی کراوە.
ئەو ئەکادیمیستە جەخت دەکاتەوە کە هۆکاری سەرەکیی دوورخستنەوەی، بۆ توێژینەوە و داکۆکیکردنی لەسەر مافی زمان، کەمینەکان، دۆسیەی کورد و عەلەوییەکان دەگەڕێتەوە.
ئەم بڕیارە تەنیا چەند مانگێک دوای بڵاوبوونەوەی دوایین کتێبی پرۆفیسۆر بولەنت بیڵمەز دێت لە شوباتی ٢٠٢٦ لەژێر ناونیشانی "Envantera Terteleya Dêrsimê" (ئەرشیفی کۆمەڵکوژیی دێرسیم) کە تێیدا لە ڕێگەی ٩ نموونە و شوێنی جیاوازەوە تیشکی خستبووە سەر ڕووداوە مێژووییەکانی دێرسیم.
ناوبراو ڕاشیگەیاندووە کە بۆ وەرگرتنەوەی مافە فەرمییەکانی، پرۆسەی یاسایی لە دادگاکانی تورکیا دەستپێدەکات.