بەرپرسانی باڵای سووریا ڕایانگەیاند، پرۆسەی ئامادەکاری بۆ کردنەوەی فەرمیی دەروازەی سنووریی نێوان قامیشلۆ و نسێبین دەستیپێکردووە، کە بەمەش دەبێتە حەوتەمین دەروازەی سنووریی نێوان تورکیا و سووریا.
قوتەیبە بەدەوی، بەڕێوەبەری دەروازە سنوورییەکانی سووریا، لە ڕێگەی پۆستێکەوە لە تۆڕی کۆمەڵایەتیی ئێکس ڕایگەیاند، ئامانج لە کردنەوەی ئەم دەروازەیە، پێشخستنی کەرتی دەروازە سنوورییەکان، ئاسانکاریی هاتوچۆی هاووڵاتییان و کەمکردنەوەی قەرەباڵغی و کاتی وەستان لە دەروازەکانی دیکەدا.
ئەم هەنگاوە لە کاتێکدایە که دەروازەی سنووریی نسێبین لە نێوان باکوور و ڕۆژاوای کوردستان، دوای 14 ساڵ لە داخستن، بۆ یەکەمجار دەکرێتەوە و چاوەڕوان دەکرێت بەکردنەوەی، جموجۆڵی بازرگانی و هاتوچۆ لە ناوچەکەدا سەرلەنوێ ببوژێتەوە.