میدیاکانی ئێران بڵاویانکردووەتەوە، پێشنیوەڕۆی ئەمڕۆ هێلیکۆپتەرێکی مەشقکاری سەربە سوپای پاسدارانی ئێران لە نزیک مەیدانێکی سەوزە و میوە لە دەوروبەری ئەسفەهان کەوتووەتە خوارەوە.
ئاماژە بۆ ئەوەش کراوە، بەهۆی ڕووداوەکەوە، چوار کەس گیانیان لەدەستداوە، فڕۆکەوان و یاریدەدەرەکەی، هەروەها دوو کەسی دیکە لەو کاسبکارانەی لەناو مەیدانی میوە و سەوزەکەدا سەرقاڵی کارکردن بوون.
بەگوێرەی زانیارییە سەرەتاییەکانی میدیای فەرمیی ئێران، هێلیکۆپتەرەکە، بەهۆی گرفتێکی تەکنیکی کەوتووەتە خوارەوە.
بەڕێوەبەری گشتیی ئاگرکوژێنەوەش دەڵێت، تائێستا هۆکاری ڕووداوەکە دیار نییە و لێکۆڵینەوەکان دەستانپێکردووە.