لە سێ مانگی ڕابردوودا ١٣٥ کەس لە ڕێگەوبانەکانی پارێزگای کرماشانی ڕۆژهەڵاتی کوردستان بەهۆی ڕووداوەکانی هاتوچۆوە گیانیان لەدەستداوە، و بەرپرسانی تەندروستیش خراپیی ڕێگاوبانەکان بە هۆکاری سەرەکیی ئەم ڕووداوە دڵتەزێنانە دەزانن.
بەگوێرەی ئامارە فەرمییەکان کە لەلایەن بەڕێوەبەری گشتیی پزیشکی دادی پارێزگای کرماشانەوە بڵاو کراونەتەوە، لە ماوەی سێ مانگی بەهاری ئەمساڵدا، جگە لە قوربانییە گیانییەکان، سێ هەزار و ٢٥٢ کەسیش بریندار بوون، کە لەو ژمارەیە ٩٠١ کەسیان ژن و دوو هەزار و ٣٥١ کەسیان پیاو بوون.
ئامارەکان دەریدەخەن کە زۆربەی هەرە زوری قوربانییانی ڕووداوەکانی هاتوچۆ لە دەرەوەی شارەکان و لەسەر ڕێگا سەرەکییەکان تۆمار کراون.
هاوکات لایەنە پەیوەندیدارەکان جەخت لەوە دەكەنەوە کە کێشە و کەمکوورییەکانی ڕێگاوبانەکان هۆکاری سەرەکی و بڵاوترینی ڕوودانی ئەم کارەساتە هاتوچۆییانەن لە ناوچەکەدا.