بە ئامادەبوونی سەرۆک کۆماری عێراق، سەرۆکی هەرێمی کوردستان و جێگری سەرۆکوەزیرانی هەرێمی کوردستان، لوتکەی سلێمانی 2026 لە هۆتێل گراند میلینیۆم دەست بە کارەکانی کرد و سەرکردەکان جەختیان لە گرنگیی بەهێزکردنی کەرتی تایبەت و پەرەپێدانی ئابووریی بەردەوام کردەوە.
ڕۆژی پێنجشەممە، 17ـی ئەیلوولی 2026، لوتکەی سلێمانی کە لەلایەن دامەزراوەی ڤیژنەوە ڕێکخراوە و پەخشی مێدیایی لەلایەن کۆمپانیای پرۆژەکانی ڕاگەیاندنی کوردساتەوە بۆ کراوە، لە شاری سلێمانی دەستی پێکرد.
لووتکەکە بۆ ماوەی دوو ڕۆژ بە دروشمی "ئاراستەکردنی سەرمایە بەرەو گەشەسەندنی بەردەوام لە نەشایستەی خانووبەرە و پیشەسازی" بەڕێوەدەچێت و تێیدا کۆمەڵێک پانێڵی ستراتیژی پێشکەش دەکرێن.
لە کۆبوونەوەکەدا کە چەندین بەرپرسی باڵای حکومی، سەرۆکی دەستەکانی وەبەرهێنان، خاوەنکار و پزیشک و شارەزایانی ناوخۆیی و نێودەوڵەتی تێیدا بەشدار بوون، سەرنج خسترەسەر چەندین پرسی گرنگی ئابووری و سیاسی:
وتاری سەرۆک کۆماری عێراق
نزار ئامێدی، سەرۆکی کۆماری عێراق، لە وتارێکدا گرنگیی کۆنفرانسەکەی بۆ یارمەتیدانی بڕیاردەران لەپێناو پێشخستنی ئابووریی عێراق دوپاتکردەوە و جەختی لەسەر پێویستیی هاریکاریی نێوان کەرتی گشتی و تایبەت کردەوە.
ناوبراو ڕایگەیاند کە پێویستە سامانی نیشتمانی بکرێتە پرۆژەی بەرهەمدار و ژینگەیەکی لەبار بۆ گەنجان بڕەخسێنرێت، هەروەها جەختیشی لەوە کردەوە کە ئارامیی سیاسی و ئەمنی بەبێ سەقامگیریی ئابووری بەدەست نایێت.
بانگەوازی سەرۆکی هەرێمی کوردستان بۆ جێبەجێکردنی دەستوور
لای خۆیەوە، نێچیرڤان بارزانی، سەرۆکی هەرێمی کوردستان، لوتکەکەی بە پلاتفۆرمێکی گرنگ بۆ تاوتوێکردنی داهاتووی ئابووریی هەرێمی کوردستان و عێراق وەسف کرد و ڕایگەیاند: "کاتی ئەوەیە لە ئابوورییەکی بەکاربەرەوە بگوازینەوە بۆ ئابوورییەکی بەرهەمدار."
ناوبراو ئاماژەی بەوەش دا کە ئابووریی هەرێمی کوردستان و عێراق تەواوکەری یەکترین و ناکۆکییە سیاسییەکان نابێت ڕێگر بن لەبەردەم وەبەرهێنان و ئاوەدانکردنەوەدا.
سەرۆکی هەرێمی کوردستان جەختی لەوەش کردەوە کە دەستوور دەبێت بنەمای چارەسەرکردنی کێشەکان و پاراستنی مافی هەموو پێکهاتەکان بێت و وتی: "کاتێک داوای جێبەجێکردنی دەستوور دەکەین، تەنیا شتێک بۆ خۆمان ناوەین، بەڵکو دەمانەوێت عێراقێکی بەهێز و یەکگرتوو هەبێت."
گوتەی جێگری سەرۆکوەزیرانی هەرێمی کوردستان
قوباد تاڵەبانی، جێگری سەرۆکوەزیرانی هەرێمی کوردستان، لە وتارەکەیدا دەستخۆشی لە رێکخستنی لوتکەکە لە شاری سلێمانی کرد و شارەکەی بە ناوەندی هونەر، کەلتور، داهێنان و پێشکەوتنی تەکنەلۆجیا و ئابووری ناساند.
ناوبراو جەختی لەوە کردەوە کە چارەسەرکردنی ئاستەنگە داراییەکان پێویستی بە هەوڵی هاوبەش و پتەوکردنی هاوبەشیی نێوان کەرتی گشتی و تایبەت هەیە.