بڕیارە لەم هەفتەیەدا ڕاوەماسی لە هەرێمی کوردستان، قەدەغە بکرێت، بەڕێوەبەرایەتیی سامانی ماسی، زانیاریی زیاتر ئاشکرا دەکات.
بێستون نەجمەدین، بەڕێوەبەری سامانی ماسی لە هەرێمى كوردستان ڕایگەیاند: لەم هەفتەیەدا، قەدەغەکردنی ڕاوەماسی ڕادەگەیەنن. ڕوونیشی کردەوە، بڕیارەکە بە ڕاوێژ لەگەڵ بەڕێوبەرایەتیی كشتوكاڵی پارێزگا و ئیدارە سەربەخۆکانە و قەدەغەکردنەکە، بۆ ماوەی دوومانگ و نیو دەبێت.
بەڕێوەبەری سامانی ماسی لەگەڵ ئەوەی پێشبیبی دەکات، ئەمساڵ سامانی ماسی زۆر بێت، هۆشداریشی دا بە ڕاوچییەکان و وتی: هەر ڕاوچییەک سەرپێچی بکات، سزا دەدرێت، بۆیە داوای لێ کردن، پابەندی ڕێنماییەکان بن.
ساڵانە لە وەرزی گەراداناندا و بە مەبەستی پاراستنی سامانی ماسی، حکومەتی هەرێمی کوردستان ڕاوکردن لە دەریاچە و ڕووبارەکاندا قەدەغە دەکات کە بە گشتی ماوەکەی دوو مانگ بۆ دوو مانگ و نیو دەبێت.