ڕۆژنامەی فاینەنشیاڵ تایمزی بەریتانی بە پشتبەستن بە کۆمەڵێک بەڵگە و دۆکیۆمێنت ئاشکرای کرد کە ڕووسیا لە ساڵانی ڕابردوودا بە نهێنی یارمەتیی ئێرانی داوە بۆ پەرەپێدانی تەکنەلۆژیای تایبەت بە مووشەکی کروز و هایپەرسۆنیک.
بەپێی ڕاپۆرتی ڕۆژنامەکە، مۆسکۆ لە ڕێگەی پرۆژەیەکی نهێنییەوە لە ساڵی ٢٠٢٣وە هاوکارییەکانی خۆی بۆ تاران لە بواری بەرهەمهێنانی مووشەک دەست پێ کردووە و ژمارەیەک پسپۆڕ و ئەندازیاری مووشەکیی ڕووسی لەم پرۆژەیەدا هاوکاریی تەکنیکییان بە ئێران گەیاندووە.
ڕۆژنامەکە ئامانجی سەرەکیی ئەم پرۆژەیەی بە پەرەپێدانی سیستەمی پاڵنەری «ڕەمجێت» (Ramjet) زانیوە، کە توانای هەیە خێرایی مووشەکە کروز و هایپەرسۆنیکەکان بۆ چەند هێندەی خێرایی دەنگ بەرز بکاتەوە.