بەڕێوەبەری گشتیی بازرگانیی هەرێمی کوردستان دەستپێکردنی پرۆسەی دابەشکردنی زیاتر لە 76 ملیار دیناری شایستەی دارایی جووتیارانی ڕاگەیاند و ئاماژەی بەوە دا کە لەم هەفتەیەدا تەواوی پارەکە بەسەر جووتیاراندا دابەش دەکرێت.
نەوزاد شێخ کامیل، بەڕێوەبەری گشتیی بازرگانیی هەرێم، لە لێدوانێکدا ڕایگەیاند کە بڕی 76 ملیار و 294 ملیۆن دینار وەک شایستەی دارایی جووتیاران خەرج دەکرێت و پرۆسەکە لە ئەمڕۆوە لە پارێزگاکانی هەولێر و دهۆک دەست پێدەکات.
سەبارەت بە شێوازی دابەشکردنەکە بەسەر پارێزگاکاندا، ناوبراو ئاشکرای کرد کە بڕی پارەکە بەم شێوەیە دابەش دەکرێت:
سلێمانی: زیاتر لە 29 ملیار دینار
هەولێر: 24 ملیار دینار
دهۆک: 22 ملیار دینار
بەڕێوەبەری گشتیی بازرگانیی هەرێم ئەوەشی خستەڕوو که لە سلێمانی بەهۆی تەواونەبوونی هەندێک لە ڕێکارە کارگێڕییەکانەوە، دابەشکردنی پارەکە دەکەوێتە ڕۆژی سێشەممە. جەختیشی لەوە کردەوە کە پرۆسەی دابەشکردنەکە بەپێی خشتە و ڕیزبەندیی بەرواری ڕادەستکردنی گەنمی جووتیاران لە سایلۆکاندا بەڕێوەدەچێت.