وەزارەتی خوێندنی باڵا و توێژینەوەی زانستیی سووریا (ئەنجوومەنی خوێندنی باڵا)، بڕیارێکی فەرمی بە ژمارە (٦٦٢) دەرکرد، کە تێیدا داخستنی سەرجەم کۆلێژەکانی زانکۆی "الفرات" (کە پێشتر بە زانکۆی الشرق ناسرابوو) لە پارێزگای ڕەققە ڕادەگەیێنێت و ڕێکارەکانی گواستنەوەی خوێندکاران و یەکسانکردنی بڕوانامەکانیان بۆ زانکۆ حکومییەکانی دیکەی وڵاتەکە دیاری دەکات.
بەپێی دەقی بڕیارە فەرمییەکە، ئەم بڕیارە لە سەرەتای ساڵی خوێندنی (٢٠٢٥-٢٠٢٦)ـەوە دەخرێتە بواری جێبەجێکردنەوە.
گرنگترین خاڵەکانی بڕیارەکە:
داخستنی بەشەکان (ماددەی ١): داخستنی لقی زانکۆی فورات لە پارێزگای ڕەققە بە سەرجەم کۆلێژەکانییەوە، کە پێکهاتوون لە: (کۆلێژی یاسا، کۆلێژی کشتوکاڵ، کۆلێژی ئابووری، کۆلێژی ئاداب و زانستە مرۆییەکان، کۆلێژی زانستەکان، کۆلێژی پەروەردە، کۆلێژی پزیشکی).
دانپێدانان بە بڕوانامەکان (ماددەی ٢): بڕوانامەی دەرچووانی ئەم کۆلێژانە هاوشێوەی بڕوانامەی زانکۆ حکومییەکانی تری سووریا مامەڵەی لەگەڵدا دەکرێت، ئەمەش پاش وردبینیکردن و دڵنیابوونەوە لە ڕاستوڕوستیی بەڵگەنامەکانی خوێندکار (بڕوانامەی ئامادەیی، بڕوانامەی دەرچوون، نمرەکان و ناسنامەی خوێندکار).
خوێندنی باڵا (ماددەی ٣): ڕێگە بە دەرچووانی ئەم کۆلێژانە دەدرێت کە پێشکەشی تاقیکردنەوە و کێبڕکێی خوێندنی باڵا (ماستەر و دکتۆرا) بکەن بەپێی ئەو بنەما و یاسایانەی کە پەیڕەو دەکرێن.
شوێنی جێگرەوە بۆ خوێندکاران (ماددەی ٥):
خوێندکاران دەگوازرێنەوە بۆ لقی سەرەکیی زانکۆی الفرات لە (دێرەزوور - حەسەکە - ئەلبوڕکە)، یان بۆ کۆلێژە هاوشێوەکانی تری زانکۆ حکومییەکانی سووریا.
خوێندکارانی کۆلێژی زانستە پزیشکییەکان دەگوازرێنەوە بۆ کۆلێژە تەندروستی و پزیشکییەکانی ناو زانکۆ حکومییەکان یان کۆلێژی پەرستاری لە زانکۆی الفرات، بەپێی نمرە و پسپۆڕییەکانیان.
پڕۆسەی گواستنەوەی خوێندکاران لە ساڵی خوێندنی (٢٠٢٥-٢٠٢٦) بەبێ هەژمارکردنی ساڵانی دواکەوتن ئەنجام دەدرێت.