جەڤدەت یەڵماز، جێگری سەرۆککۆماری تورکیا ڕایگەیاند، دەستەی جێبەجێکردنی یاسای چوارچێوەی تایبەت بە پرۆسەی ئاشتی و کۆمەڵگەی دیموکراتیک دوای واژۆکردنی یاساکە لەلایەن ڕەجەب تەیب ئەردۆغان، سەرۆککۆماری وڵاتەکە، بە فەرمی دامەزراوە.
جەڤدەت یەڵماز لە ڕێگەی پۆستێکی تۆڕی کۆمەڵایەتیی ئێکسەوە ئاماژەی بەوە دا کە وەزارەت و دامەزراوەکانی حکومەت لەناو ئەم دەستەیەدا دەستبەکار بوون و یەکەم کۆبوونەوەی دەستەکەش ڕۆژی دووشەممەی هەفتەی داهاتوو بەڕێوەدەچێت.
ناوبراو ڕوونیشی کردەوە کە لە کۆبوونەوەکەدا، بەگوێرەی پێویستییەکانی یاسای چوارچێوە، چەند کۆمیسیۆنێک دادەمەزرێنرێن و هەڵسەنگاندنی پێویست بۆ قۆناغەکان و هەنگاوەکانی داهاتوو ئەنجام دەدرێت.
ئەمە لە کاتێکدایە کە ئەمڕۆ، دوا بە دوای واژۆکردنی یاسای چوارچێوە لەلایەن سەرۆککۆماری تورکیاوە، دەقی یاساکە لە ڕۆژنامەی فەرمیی وڵاتدا بڵاوکرایەوە و چاوەڕوان دەکرێت لە هەفتەی داهاتوودا هەنگاوی گرنگ و نوێ سەبارەت بەم پرۆسەیە بنرێت.