وەزارەتی دەرەوەی ئیسرائیل هێرشێکی توندی کردە سەر دەسەڵاتدارانی تورکیا لە بەرامبەر ڕەخنەکانی ئەنقەرە بۆ سەر ئیسرائیل سەبارەت بە بەرزاییەکانی جۆلان، و تورکیای تۆمەتبار کرد بەوەی بەشێک لە خاکی وڵاتانی دراوسێی داگیر کردووە.
وەزارەتی دەرەوەی ئیسرائیل لە پەیامێکدا لە تۆڕی کۆمەڵایەتی "ئێکس" وەڵامی ڕەخنەکانی تورکیای دایەوە و ڕایگەیاند، ئەنقەرە لە پێگەیەکدا نییە وانەی سەروەریی خاکیان پێ بڵێت. ئیسرائیل ئاماژەی بەوە کردووە کە هەزاران سەربازی تورک و دەیان بنکە و بارەگای سەربازی لە خاکی وڵاتانی دراوسێدا بڵاوەیان پێکراوە.
لە پەیامەکەدا هاتووە کە تورکیا 36٪ی خاکی قوبرس، 5٪ی خاکی سووریا و نزیکەی 2000کیلومەتر چوارگۆشە لە خاکی عێراقی داگیر کردووە.
ئەم ئاڵۆزییە دوای ئەوە هات کە دەسەڵاتدارانی تورکیا ڕەخنەی توندیان لە بەردەوامیی کۆنتڕۆڵکردنی بەرزاییەکانی جۆلان لەلایەن ئیسرائیلەوە گرتبوو.