ئەنجومەنی باڵای فەتوای کوردستان ڕاوکردنی ئاژەڵ و باڵندەی کێویی بە مەبەستی حەز و کاتبەسەربردن قەدەغە کرد و ڕایگەیاند، ڕاوکردن تەنها لە کاتی پێویستبوون بە گۆشتەکەیاندا ڕێگەپێدراوە.
بەپێی وەڵامێکی ئەنجومەنی فەتوا بۆ نووسراوی بەڕێوەبەرایەتیی گشتیی ئەوقافی هەولێر، جەخت لەوە کراوەتەوە کە نابێت ئاژەڵ و باڵندەکان بکرێنە نیشانە تەنها بۆ خۆشی و کاتبەسەربردن، بەڵکو ڕاوکردن تەنها کاتێک دروستە کە هاووڵاتی بەڕاستی پێویستی بە گۆشتەکەی هەبێت.
لە ڕاگەیەنراوەکەدا ئاماژە بەوەش کراوە کە تەنها لەناوبردنی ئەو ئاژەڵ و دڕندانە ڕێگەپێدراوە کە زیان بە گیانی مرۆڤ، کێڵگە و پەلەوەر دەگەیەنن، و لە کۆتاییشدا داوا لە هاووڵاتییان و بەرپرسان کراوە کە پارێزگاری لە ژینگە و سروشتی کوردستان بکەن.