— بەڕێوەبەرایەتیی پۆلیسی دارستان و ژینگەی سلێمانی ڕایگەیاند کە بەهۆی شۆرتی کارەباوە ئاگرێک لە سنووری گوندەکانی زێوێ و قەرەچەتانی سەر بە ناحیەی پیرەمەگروون کەوتەوە و زیاتر لە 50 دۆنم پوش و پاوان و داری سروشتیی ناوچەکەی سوتاند.
بەڕێوەبەرایەتییەکە لە ڕاگەیەندراوێکدا ئاماژەی بەوە دا کە بنکەی پۆلیسی دارستان و ژینگەی پیرەمەگروون توانیویانە بە هاوکاری و بەشداریی مەیدانیی خەڵکی ناوچەکە، ئاگرەکە کۆنتڕۆڵ بکەن و ڕێگری لە تەشەنەکردنی زیاتری بکەن.
کەوتنەوەی ئاگر لە پوش و پاوان و دارستانە سروشتییەکانی هەرێمی کوردستان لە وەرزی هاوین و پاییزدا یەکێکە لە کێشە ژینگەیییە بەردەوامەکان.
بەپێی ئامارەکانی پۆلیسی دارستان، ساڵانە بە هەزاران دۆنم لە زەویی سروشتی، دارستان و ڕەز و باخی هاووڵاتییان دەسووتێن، ئەمەش زیانی گەورە بە سامانی سروشتی و هەڵکەوتەی ژینگەییی ناوچەکە دەگەیەنێت.