ئاژانسی نێودەوڵەتی وزەی ئەتۆم هۆشدارییەکی توند لەبارەی دۆخ و بەرنامە ئەتۆمییەکەی ئێران دەدات و ڕایگەیاند، تاران ماوەی شەش مانگە ڕێگە بە پشکنەرەکانی نادات سەردانی دامەزراوە ئەتۆمییەکان بکەن و چارەنووسی نزیکەی 440 کیلۆگرام یۆرانیۆمیش نادیارە.
لە نوێترین ڕاپۆرتی فەرمیی ئاژانسەکەدا کە لە ڤییەنا بڵاو کراوەتەوە، هاتووە کە سنوردارکردنی تیمەکانی پشکنین و بێبەشبوونی ئاژانسەکە لە زانیاریی مەیدانی، توانای هەڵسەنگاندنی بۆ پێشکەوتنەکانی تاران لە چالاکییە ئەتۆمییەکانیدا لاواز کردووە.
بەگوێرەی ئامارەکانی ئاژانسەکە، تاران خاوەنی نزیکەی 440 کیلۆگرام یۆرانیۆمی پیتێنراوە (بە ڕێژەی نزیکەی 60%)، بێ ئەوەی هیچ زانیارییەک یان ڕونکردنەوەیەکی پێویست لەبارەی شوێن و دۆخی ئێستای ئەو بڕە کەرەستەیە بە پشکنەران بدات.
ئەمە لە کاتێکدا ئاژانسی نێودەوڵەتی وزەی ئەتۆم جەخت لەوە دەکاتەوە، پەرەپێدان و شاراردنەوەی ئەو ڕێژەیە لە یۆرانیۆمی پیتێنراو نیگەرانییەکی قووڵی لێکەوتووەتەوە، چونکە بەپێی پێوەرە فەنییەکان، ئەو بڕە لە کەرەستە ئەگەر بگەیەنرێتە ئاستی باڵاتر، بەشی دروستکردنی چەندین چەکی ئەتۆمی دەکات و دۆخەکە بەرەو مەترسییەکی گەورە دەبات.