بەڕێوەبەری ناوەندی شوێنەواری جیهانیی تەختی سولەیمان لە ناوچەی تیکابی سەر بە پارێزگای ورمێ ڕایگەیاند، لە ماوەی سێ مانگی ڕابردوودا، 32 هەزار و 643 گەشتیاری ناوخۆیی و بیانی سەردانی ئەم کۆمەڵە شوێنەوارییە مێژوویییەیان کردووە.
تەختی سولەیمان ناوەندێکی گرنگی مێژوویی و گەشتیاریی ڕۆژهەڵاتی کوردستانە و چەندین شوێنەواری گرنگی وەک پەرستگەی ئازەرگۆشنەسپ، پەرستگەی ئاناگیتا، ئەیوانی خەسرەو، دیوار و بورجەکانی پاراستن و شوێنەوارەکانی سەردەمی ئێلخانییەکانی لەخۆ گرتووە، هەروەها ناوچەکانی دەوروبەری وەک زیندانی سولەیمان، چیای بلقەیس و بەردی ئەژدیها سەرنجی گەشتیارانیان ڕاکێشاوە.
لە سەر ئاستی پارێزگای ورمێ، زیاتر لە 1,796 شوێنەواری مێژوویی لە لیستی شوێنەوارە نیشتمانییەکانی ئێراندا تۆمار کراون و ڕێکارەکانی هەڵسەنگاندن بۆ 100 شوێنەواری دیکەش بەردەوامە.
ئێستا 22 مۆزەخانە لە پارێزگاکەدا چالاکن کە دووانیان لەلایەن کەرتی تایبەتەوە ئیدارە دەدرێن، هەروەها پلان دانراوە بۆ دروستکردنی 9 مۆزەخانەی نوێ لە ناوچەکەدا.
زیاتر لە 32 هەزار گەشتیار سەردانی شوێنەواری مێژووییی تەختی سولەیمانیان کردووە
