هێزەکانی ئیدارەی زانیاریی ئێران لە شاری شنو، مەهاباد و بۆکان، چوار هاووڵاتیی کوردیان دەستگیر کردووە.
بەگوێرەی ڕاپۆرتی ڕێکخراوی هەنگاو، مەسعود عەلانی کۆنەقەڵە، ئەمیر سولەیمانی، ئیسماعیل بادسار و زەکریا بادسار لە کاتێکدا دەستگیر کراون کە شەپۆلی دەستگیرکردنی کوردان لە ناوچە کوردنشینەکانی ئێران بەردەوامە.
لە بۆکان، هێزەکانی ئیدارەی زانیاری بە جلوبەرگی کارمەندی کۆمپانیای گاز چوونەتە ماڵی خێزانی بادسار و پاش نەدۆزینەوەی زەکریا، باوکی، ئیسماعیلیان بۆ چەند کاتژمێر دەستگیر کردووە.
دواتر زەکریا خۆی بە ئیدارەی زانیاری ناساندووە و دەستگیر کراوە، پاشان باوکەکەی ئازاد کراوە.
لە شنو، مەسعود عەلانی کۆنەقەڵە، گۆرانیبێژی کورد، لە کافێیەک دەستگیر کراوە و هێزە ئەمنییەکان دواتر ماڵەکەشیان پشکنیووە.
جێی باسە ئەو پێشتر چەند جارێک بەهۆی گوتنی گۆرانی و سرودی کوردی بانگهێشت و دەستگیر کراوە.
لە مەهابادیش، ئەمیر سولەیمانی، ٤٤ ساڵە و خاوەنی دوو منداڵ، لەلایەن هێزەکانی ئیدارەی زانیارییەوە دەستگیر کراوە.
هەنگاو دەڵێت هێشتا هۆکاری دەستگیرکردنەکان، شوێنی ڕاگرتنیان و تۆمەتەکان دژی ئەم سێ کەسە ڕانەگەیەنراون و دەستگەیشتن بە پارێزەر و پەیوەندی بە خێزانەکانیان بۆیان ڕێگەپێدراو نییە.