سوپای پاسدارانی شۆڕشی ئیسلامیی ئێران لە وەڵامی ئەگەری هێرشی زەمینیی ویلایەتە یەکگرتووەکانی ئەمریکا بۆ سەر دوورگەکان یان خاکی ئێران ڕاگەیەندراوێکی بڵاو کردەوە و تێیدا جەختی کردەوە, کە بۆ دوورخستنەوەی هەمیشەیی کاریگەری جەنگ لە وڵاتەکەیان، هیچ ڕێگەیەک جگە لە خۆڕاگری و سەپاندنی تێچووی قورس بەسەر دەستدرێژکاردا نییە.
لە ڕاگەیەندراوەکەدا سوپای پاسداران هۆشداریی دا، ئەگەر هێرش و دەستدرێژییەکانی ئەمریکا دژی ئێران بەردەوام بن، وەڵامێکی یەکلاکەرەوەیان دەبێت و بە تەواوی ئامادەن بۆ ئەنجامدانی کردارێکی سەربازیی پەشیمانکە، کە دەرئەنجامەکەی ببێتە هۆی ڕاگەیاندنی ماتەمینیی گشتی لە ناوخۆی ئەمریکادا.
هاوکات سوپای پاسداران ئاماژەی بەوەش کرد، پرۆسەی سزادانی دەستدرێژکاران بەردەوامیی دەبێت و پێویستە واشنتن تێچوویەکی قورس لە بەرامبەر بەڵێن شکێنی و پێشێلکردنی ڕێککەوتنەکان بدات، تاوەکو ئەو تێگەیشتنە لای سەرکردایەتیی ئەمریکا دروست نەبێت، کە هەر کاتێک بیەوێت دەتوانێت جەنگ دژی کۆماری ئیسلامیی ئێران هەڵبگیرسێنێتەوە.