وەزارەتی دەرەوەی عێراق، ئێوارەی شەممە، وردەکاریی ڕووداوی تەقەکردن لە بەلەمێکی ڕاوچیانی عێراقی لەلایەن پاسەوانی کەناراوەکانی کوێتەوە ئاشکرا کرد و ڕایگەیاند، لە کۆبوونەوەیەکی فەرمیدا لەگەڵ بەرپرسانی کوێت دۆسیەکەیان تاوتێ کردووە و لایەنی کوێتیش گرتەیەکی ڤیدیۆیی لەسەر چۆنیەتی ڕووداوەکە نیشانی شاندی عێراقی داوە.
وەزارەتی دەرەوە لە ڕاگەیاندراوێکدا ئاماژەی بەوە کردووە، ڕووداوی تەقەکردنەکە لە 3ی تەممووزی 2026 ڕوویداوە و بووەتە هۆی گیانلەدەستدانی ڕاوچییەک و دەستبەسەرکردنی چەند ڕاوچییەکی دیکە. دوابەدوای ئەوە، فوئاد حوسێن، وەزیری دەرەوەی عێراق، لە کاتی سەردانە فەرمییەکەیدا بۆ کوێت لە 8ی تەممووز، ئەم بابەتەی بە توندی لەگەڵ سەرکردایەتی کوێت و فەهد یوسف، وەزیری ناوخۆی ئەو وڵاتە تاوتێ کردووە و ڕەتکردنەوەی قورسی عێراقی بۆ دووبارەبوونەوەی ئەم جۆرە ڕووداوانە دەربڕیوە کە زیان بە پەیوەندییە براینییەکان دەگەیەنێت.
ئەم کۆبوونەوەیە بە ئامادەبوونی قاسم عەبوودی، ڕاوێژکاری ئاسایشی نەتەوەیی عێراق و ئەسعەد عیدانی، پارێزگاری بەسڕە بەڕێوەچوو.
بە گوێرەی راگەیاندراوەکە، لایەنی کوێتی لەو کۆبوونەوەیەدا گرتەیەکی ڤیدیۆیی تۆمارکراوی ڕووداوەکەی نمایش کردووە و ڕوونیان کردووەتەوە، کە ڕووداوەکە لە شەودا بووە و هێزەکانی کوێت بە هیچ شێوەیەک مەبەستیان نەبووە زیانی گیانی بەدوای خۆیدا بهێنێت.
وەزیری دەرەوەی عێراقیش داوای لە باڵیۆزخانەی عێراق لە کوێت کردووە بەردەوام بێت لە بەدواداچوونی ئەنجامی لێکۆڵینەوەکان و جەختیشی کردەوە، کە پاراستنی ئاسایشی ئاوە هەرێمییەکانی عێراق تەنیا لە ئەستۆی هێزی دەریایی عێراقدایە.
ڕۆژی پێنجشەممەی ڕابردوو، ئەو ڕاوچییە عێراقییانەی لە کوێت دەستبەسەرکرابوون (حەسەن خالید، جەعفەر حەسەن، و ماجد محەممەد) لەگەڵ تەرمی ڕاوچییە کۆچکردووەکە (نەجم عەبدوڵڵا) و ڕاوچییە بریندارەکە (سائر محەممەد)، کە لە ناوچەی سەریدا بریندار ببوو، لە ڕێگەی دەروازەی سنووریی سەفوانەوە گەڕانەوە عێراق.
وەزارەتی دەرەوەی عێراق وردەکاریی تەقەکردنی کوێت لە ڕاوچییە عێراقییەکان بڵاودەکاتەوە
